Såkurs og medlemsmøte på Skårhaug 9. februar

Eid hagelag hadde medlemsmøte og såkurs torsdag 9. februar i det nye "klubbhuset" vårt på Skårhaug. Det møtte om lag femten medlemar, som fekk vere med og diskutere og kome med innspel til handlingsplanen for 2017. Det var også loddsal, kaffe og kaker i ei sjarmerande gamal stove i huset til Marit Sandnes Skrede, som var vertinne for oss. Kikk på årsplanen som er lagt ut både her i bloggen og på Facebook-gruppa vår. (Søk på Eid hagelag) Mykje spennande som er planlagt, mellom anna turar og hagevandringar. Alltig hyggeleg å vere med hagelaget på tur!



Å så diverse frø på seinvinteren kan by på utfordringar. Johannes Nome forklarer og viser korleis det er lurt å gjere det. Lys, temperatur, varme - og kor mykje vatn? Gjengen her ser veldig alvorlege ut, men er helst konsentrerte... Stemninga var god!

Gartnar Johannes Nome demonstrerer bruk av såbrikettar og torvpotter.

Vi anbefalar alle å så eit eller anna på denne tida av året. Berre synet av grønne spirer gjer deg i godt humør. Og vi hagefolk har så mykje godt i vente! 

Vil du sjå bilete frå ei fantastisk hagereise til England?

Torsdag 14. mars. kl. 20.00 møtest vi på Eid frivillegsentral for å sjå bilete frå Hageselskapet Sogn og Fjordane sin tur til England i pinsen i fjor. Det er leiar Herdis Bergset som viser og snakkar om bileta.

Dette blir ein hyggeleg kveld med mykje inspirasjon før komande hagesesong. Kanskje blir du inspirert til å reise også? Det er mange hagefolk som går med ein draum om å kome til England og oppleve noko av alt det flotte dei har å vise fram i eit av verdas mest "hagekultiverte" land.

Det blir som vanleg inngangspengar på kr. 50,-
Vi har loddsal, og kaker og kaffe/te.

VEL MØTT!

Lær å dyrke grønnsaker!

Så er vi klare for ein ny sesong i hagelaget. Torsdag 1. mars kl. 19 får vi besøk av Annlaug Rygg frå Gloppen. Ho skal vise bilder frå den svært rikhaldige kjøkkenhagen sin, og snakke om kva ho dyrkar, og korles ho gjer det.

Nokre av oss i styret har hatt gleda av å høyre Annlaug før, og vi veit at ho sit inne med svært mykje erfaring med dyrking av alle slags matplantar. Ho er også levande oppteken av korleis ein lagar til og tek vare på produkta, noko som jo er svært viktig om ein skal få glede av dei ferske, sunne og kortreiste matvarene ein kan dyrke sjølv om ein har ein hageflekk.

Møtet blir på Eid kyrkjetun. Det blir inngangspengar på kr. 50, og loddsal, kaffe og kaker slik vi brukar. Ta med deg ein venn og møt opp, om ikkje anna så for å få sjå vakre bilete frå hagen til Annlaug og drøyme deg vekk til vår og sommar for ei stund...

Da vil vi ynskje alle VEL MØTT!

Under ser du squashplanter. Den første med frukt, og etterpå heile planta med bladverk og dei karakteristiske gule blomstene. Squash er moro å dyrke, fordi du vanlegvis får bra avling og dei veks fort. Du kan risikere å måtte gje vekk til naboen, men det er jo hyggeleg. Det finst også oppskrift på SJOKOLADEKAKE MED SQUASH, og den er god og kan anbefalast:-)

Vi må også unne oss eit lite vårbilete til slutt. Snart er vi der!

Beskjæring av frukttre og bærbusker

Torsdag 17. mars inviterte hagelaget og Eid bondelag til kurs om beskjæring av frukttre hjå Anna Wuttudal og Gunnvald Hildenes på Hildenes.

Det var Rune Vereide frå Gloppen som tok turen over fjorden for å undervise oss. Til dagleg jobbar han ved Norsk Landbruksrådgjevning, så han hadde virkelig mykje å lære vekk om dagens tema.

Demonstrasjonen starta med nokre ord om kva reiskapar som eigna seg til denne typen arbeid.

Dette morelletredet har fått vokse relativt fritt i nokre år, så her skulle Rune Vereide få boltre seg fritt med sekatør og sag. Mange forgreiningar gjer at lyset ikkje slepp godt inn i tredet, og ein del av desse forgreiningane bør vekk. Greiner som er skadde, eller som gneg mot kvarandre må fjærnast.

Eit godt tips undervegs er å ta eit steg tilbake undervegs, og studere tredet, slik at ein får eit godt overblikk over korleis arbeidet skrid fram.

Eit prinsipp Vereide tykte var verdt å prøve å halde seg til var å la ein hovudstamme vekse opp til ynskt trehøgd. Vidare fokuserte han på kor viktig det var å få godt med lys inn i trekrona.

Om du ser godt etter på biletet ser du at greina han held handa på no er klipt ganske langt frå stammen (omlag ei saksebreidd). Grunnen til at han klipper den såpass lang, er at då kan nye skot komme frå greinstammen som står att. Dersom det skulle komme bakterier i "såret", vil det ikkje så lett angripe stammen som greina veks ut frå.

Det er ikkje berre klippereiskapa som skal være gode. Han hadde med seg ein god stige som eigna seg svært godt når ein skal komme nær tredet.Den har tre føter, og er lett å få plassert trygt under tredet.

Rune vereide og leiaren i hagelaget, Herdis Bergset i ivrig diskusjon ved kaffibordet etter demonstrasjonen.

Vereide anbefalte ei bok som heiter Nyttedyr, skadedyr og sjukdom i frukt- og bærhagen, skriven av Olav Sørum.

Ein stor takk til vertskapet, Anna og Gunnvald, som var så gjestfrie og stilte både frukttre og stova si til disposisjon! Det gjorde utruleg godt med traktorvafler og ein god og varm kopp kaffi etter ei noko kjølig økt utandørs!

Såing av stauder og sommarblomster

Såing av sommarblomster og Stauder ved Gro Haga.

Torsdag 10. februar er det sesongåpning for Eid hagelag. Då arrangerer hagelaget foredrag om Såing av sommarblomster og stauder.

Foredragsholdaren er Gro Haga frå Viksdalen. Ho er sekretær i Hageselskapet Sogn og Fjordane og leiar av Gaular hagelag. Ho var hjå oss i fjor også. Då var det støyping av hypertufa som var temaet. Ho har vore hageintressert heile livet og har massevis av eigne erfaringar som ho kan dele med oss frå sin eigen hage i Viksdalen.

Det er litt i tida å dyrke sine eigne grønsaker. Gro Haga er spesielt intressert i dette, og vil ta for seg det også under foredraget.

Foredraget vert på Stokkenes gjestegard kl 20.00.

Vi håpar mange vil ta turen. Vi trur det blir ein trivelig og inspirerande kveld sånn heilt i starten av hagesesongen. Ein treng ikkje vere medlem for å komme, alle er like velkomne.

Sjølvsagt vert det som vanleg lotteri, kaffi og noko å bite i .

Trivelig julemøte

Torsdag hadde vi eit svært trivelig julemøte der Fred Arild Grøneng frå Florø viste lysbilder frå ulike hagar han har besøkt på vestlandet. Vi var ikkje meir enn 14 frammøtte, men det hindra oss ikkje i å få ein kjempetrivelig kveld med julegløgg, kaffi, kaker og stearinlys på borda.

Dei fleste bileta Grøneng viste var frå hagar han vitja medan han guida ein journalist frå Norsk hagetidend som skulle lage reportasjar frå vestlandshagar.
Nokre av hagane var ikkje ukjende for medlemmene. Blandt anna såg vi bilete frå hagane til Eva Hagen, Svanhild Ryssdalsnes og Terje Haddal, og alle desse hagane er hagar som hagelaget har vitja i løpet av dei siste åra. (Ryssdalsnes sin hage kjem faktisk også på neste års program)

I pausen overrekte hagelaget sin leiar Herdis Bergset, ein St.Paulia som takk for at han tok turen til Eid. Det Herdis ikkje visste var at ho hadde plukka ut ein av Grøneng sine favorittar blandt inneplantar, og det er jo alltid trivelig når ein treff blink med takkegåvene :)
Grøneng viser fornøygd fram St.pauliaen.

Lokalet var pynta med lilla serviettar, vintergrønt, lysestakar og dekorasjonar så det vart reine adventsstemninga.

Styret i Eid hagelag takkar for ein trivelig hagesesong, og ynskjer med dette ei retteleg god jul og godt nyttår til alle medlemmene. Vi håpar at neste års program som de finn i sidekolonna på bloggen vil friste mange til å følge oss gjennom neste sesong også.

Frømøte på Stokkenes gjestegard

Det vart ein trivelig frøkveld på Stokkenes gjestegard for dei 10 som deltok. Ein liten snøstorm og kulde hindra oss ikkje i å tenkje på planlegginga av årets hagesesong. Varm kaffe og noko godt å bite i attåt gjev alltid litt ekstra god stemning rundt bordet.

Dagens program var såing, mest om sommarblomster, men også litt om stauder. Det var sekretæren som fekk i oppdrag å stå for det "faglege".

Biletet over viser utstyr som kan nyttast for å så. Mange trur ein må ha dyrt og flott utstyr for å setje i gang med såing, men her kan ein komme langt med forholdsvis lite.

Det er ikkje nødvendig å kjøpe såjord, ein kan godt bruke vanleg jord. Såjorda inneheld mindre gjødsel og meir sand enn vanleg jord. Den er også finare, slik at det kan være lettare å prikle småplantar som er sådd i denne jorda enn i vanleg plantejord. Mange likar å så i torvbrikettar, men då bør ein ikkje så meir enn eitt eller to frø i kvar brikett.

På dei fleste frøpakkane står det kva behandling frøa likar på baksida. Nokre frø er lysspirande, og dei må ikkje dekkast med jord når ein sår, medan andre må ligge nedi jorda for å spire. Såtabellen som vart delt ut på møtet er eit godt hjelpemiddel. Der finst opplysningar om såtid, kor lang tid det tek før planten blomstrar og når den blomstrar. For dei som ikkje var på møtet, kan tabellen printast ut frå Hagegal. Her kan ein også finne mykje spennande informasjon om formeiring av plantar, og ellers alt som har med blomster og hageliv å gjere.

Merking av pottene er svært viktig. Ein kan skrive direkte på pottene, eller bruke pinnar som kan puttast nedi såpotta. Når spirane kjem opp av jorda er det ikkje alltid like enkelt å vite kva som er i pottene dersom ein har slurva med merkinga.

Desse merkepinnane er laga av ei gammal persienne som er klipt opp i passande bitar. Dette fungerer godt, men vær obs på at det kan bli ganske skarpe klippekantar på dei. Ellers kan ein få kjøpt merkepinnar i mange ulike utformingar. Hugs berre å nytte ein vassfast tusj eller blyant når du skriv, slik at ikkje merkinga forsvinn

Når frøa er i jorda skal dei setjast lunt med plastdekke over. Eit lite minidrivhus som dette kan være fint, men plast duger like fint. Hugs berre på at det må komme frisk luft til jorda og frøa iblant, slik at det ikkje byrjar å mygle under plasten. Når frøa spirar, vil dei gjerne ha det litt kjøligare, så då må dei flyttast.

Dersom du har begrensa lysforhold er det viktig å ikkje starte såinga for tidleg. Forholdet mellom temperatur og lys etter at frøa har spirt er viktig for å få eit bra resultat med småplantane sine. Dersom det blir for varmt i forhold til lysmengda, vil ein få lange, tynne spirer. Derfor kan det være greit å prøve å halde temperaturen etter spiring på 12-15 grader. Dersom ein ikkje har plantelys, kan ein setje småplantane under vanlege lysstoffrør.

Det viktigaste av alt: Kos deg med såinga di! Gled deg over dei spirane som etter kvart dukkar opp i pottene dine. Det er ingen katastrofe om ikkje alle spirane veks opp, det gjer dei heller ikkje ute i naturen.

Frømøte på Stokkenes gjestegard torsdag 4. februar

No har det vore rimelig kaldt og vinterlig ei god stund, men vi er på veg mot lysare og varmare tider. Mange av oss kriblar i fingrane etter å komme i gang med årets hagesesong. Det er derfor ikkje unaturleg å starte hagelagssesongen med eit frømøte.

Medlemmer i hagelaget vil prate litt om såing av sommarblomster og stauder. Det vert eit enkelt og uhøgtileg arrangement der ein kan spørje kvarandre til råds og gjerne komme med eigne erfaringar. Dei som ynskjer det kan ta med seg frø og bytte. På denne måten kan det hende ein får prøve sortar ein ellers ikkje hadde kome til å så sjølv, så dette kan bli spennande!


Som vanleg byr vi på noko å bite i og ein kaffitår eller to. Det vert lotteri med premiar som speglar temaet for dagen.

Vi ynskjer både medlemmer og ikkje medlemmer velkomne.

Vel møtt!

Julemøte på Stokkenes gjestegard

Tirsdag 24.november kl 19.30 vert det julemøte på Stokkenes gjestegard.

I år vil vi vise lysbilete frå hagelaget sine aktivitetar i året som har vore. Dette blir ein fin anledning til å sjå også frå dei hagevandringane du ikkje hadde mogelegheit til å delta på i året som gjekk.

Vi satsar på ein trivelig mimrekveld med gløgg og julemat og lotteri med fine premiar.

Håpar mange finn vegen til Stokkenes denne kvelden!

Årsmøte

Årets årsmøte vert 22.oktober kl 20.00 i lokala til frivilligsentralen.

Sakliste:

1. Godkjenning av innkalling.

2. Konstituering

- val av ordstyrar

- val av møtereferent

- val av to til å skrive under møtereferatet

3. Årsmelding

4. Rekneskap

5. Endring av vedtekter?

6. Innkomne saker

7. Val

8. Handlingsplan

Sopptur laurdag 12. september

Laurdag 12. september satsar vi på å få til den planlagde soppturen for i år. Opplegget for dagen er at vi tek ein liten skogstur først. Dei som vil plukke sopp kan gjere det, og dei som heller vil plukke bær eller materiale til juledekorasjonar etc. kan gjere det. Dei som berre vil nyte naturen og hyggeleg fellesskap får gjere det også.

Etterpå samlast vi i hytta nede på Vaskeplassen ved Eidselva/Hærmuseet, der vi har fyr på peisen, og utlodning, kaffe og kaker som vi brukar. Då er vi rimeleg uavhengige av været, men det er likevel lurt å kle seg godt.

Vi har ikkje med oss dei store soppekspertane, men nokre av oss kjenner og plukkar tre-fire sikre soppar, og kan gå god for tryggleiken om vi held oss til desse. Vi har også med soppbøker til utlån. Ta med papirposar eller korg til å plukke i, og gjerne ein liten, spiss kniv. Det er nok lurt å ha støvlar eller anna vasstett fottøy.

OBS!!! Ta på deg refleksvest! Hjortejakta har byrja, og da er det greit at vi er godt synlege:-)

Møt opp bak busstasjonen på Nordfjordeid kl 12.00

Hildenes gartneri

Til tross for kluss med annonseringa klarte vi å tromme saman ein gjeng hageintresserte til dagens arrangement på Hildenes gartneri. Saman med gjengen frå Hornindal hagelag, så vart vi ein passeleg stor gjeng. Som biletet over viser, var det litt av kvart spanande å sjå. Før omvisninga fekk vi ein demonstrasjon på korleis vi kan lage flotte oppsatsar og mindre, men svært dekorative arrangement.

Her er det Irene som fortel om livet i drivhusa på gartneriet. Dei fleste av oss som møtte opp vart overraska over dei store mengdene blomster gartneriet produserer sjølv.

.

Det neste arrangementet blir hagevandring hjå Eli Orheim på Stårheim. På grunn av den fantastiske våren vi har hatt så langt, er arrangementet framskunda til 6. mai. Vi må rett og slett skunde oss å sjå hagen, fordi den er på sitt beste på vårparten :)

Håpar mange nye, hageintresserte vil komme!

Omvisning på Hildenes gartneri

Mandag 27. april slår vi oss saman med 'Honndølene'. Vi tek då turen til Hildenes gartneri, der vi vil få omvisning og litt demonstrasjon av Irene Berteig. Omvisninga startar kl 18.00, og vil vare ca ein times tid. Om du ynskjer å handle litt, kan du gjere det før omvisninga startar.

Etterpå går turen til Bryggen hotell. Der kan vi fortsette hagepraten over ein kopp kaffe eller te.

Vel møtt!

Sesongstart i hagelaget

Sesongstart for Eid hagelag var 12. februar. Tema for dagen var såing av stauder og sommarblomster. Det var omlag 10 personar som møtte denne dagen, og det vart ein triveleg kveld med lystig prat og diskusjonar.

Harald Bakke er hagelaget sin guru når det gjeld såing av stauder. Han delte villig vekk sine erfaringar. Han hadde med seg jord, potter og frø, og viste oss korleis det skulle gjerast og svarte på spørsmål undervegs.

Herdis, leiaren i hagelaget, er sjølv ivrig såar, og fulgte nøye med for å få med seg gode tips og idear.

Sånn ser det ut i pottene når Harald er ferdig å så. Desse pottene gav han vekk til hagelaget si utlodning. Då spørs det om vinnarane har like grøne fingrar som Harald har.

Hagelaget hadde kjøpt inn lotteripremiar som høva godt til tema for dagen. I tillegg til eit par slike og Harald sine ferdigsådde potter var der nokre posar med frø i premiepotten.

Kom gjerne innom bloggen vår og sjå kva vi skal til med i tida framover, kanskje vi kan lokke deg til å være med oss?

Anten du er medlem i Hageselskapet eller ikkje, så er du like velkommen på arrangementa våre.