EID HAGELAG

PROGRAM 2012

2012-01-08T18:23:00.003+01:00

GODT NYTTÅR TIL ALLE HAGEVENNER!

Nå har vi laga program for hageåret 2012 i regi av Eid hagelag, og sendt til redaksjonen for Årboka. Veit du ikkje kva Årboka er? Dersom du er medlem av Hageselskapet får du kvart år i januar tilsendt eit hefte som blir gjeve ut av Hageselskapet Sogn og Fjordane. I dette heftet finn du ein oversikt over planlagde aktivitetar for dei aktive Hagelaga i fylket. Vi legg ut programmet vårt her også, så har du tilgang til det fleire stader.

MARS

01.03. Eid Kyrkjetun kl. 19.00. Annlaug Rygg: Den matnyttige hagen. Frå frø til ferdig produkt.

Veke 12 – 19.-22. mars. Fjordly. Hagedesignar Yvonne Dengin, kjend frå “Kjærlighetshagen” på NRK. Tema: Korleis bruke uterommet i dag, korleis tenkje hageplanlegging og heilskap, den moderne naturhagen. Vi legg opp til samkøyring frå Nordfjordeid. Ta kontakt.

APRIL

12. april. Eid kyrkjetun kl. 19.00. Hagekonsulent Heine Hågensen frå Stokke med foredraget “Årstidssirkelen”. Tema er fargeplanlegging i hagen. Sjå heimesida www.grytingengard.no.

MAI

10.05. Kl. 18.00 på busstasjonen. Hagevandring hos Magnhild Stokkenes. Magnhild sår hundrevis av sommarblomster i drivhuset sitt, og i tillegg står tulipanane i fullt flor nå. Vi tek ein kaffekopp i grønne omgivnader i drivhuset.

19.05. Hagetur til Sunnmøre. Oppmøte 09.00 på busstasjonen på Eid. Besøk hos rhododendroneksperten Ole Johnny Larsen i Spjelkavik, Viddals gartneri og hagesenter i Brusdalen og besøk hos Turid Mork Bakke, Volda.

JUNI

02.06. Kl. 11.00 Stor hagemarknad på Almenningen, Eid. Det blir sal av vafler/kaffe. Vi har også sal av hageplantar til ein rimeleg penge (mykje å spare for deg med nyetablert hage, og muleg å skaffe seg plantar ein ellers ikkje får tak i). Vi har også med oss ulike hageaktørar, både profesjonelle og andre, som har stiklingar, sommarblomster og anna interessant til sals. I tillegg har du sjansen til å få ekspertråd når det gjeld plantar; stell, krav til veksttilhøve og liknande. Få også med deg den spektakulære PLANTEAUKSJONEN, der du i tillegg til å gjere eit plantekupp av dei skjeldne også på kjøpet får oppleve eit show med rappkjefta auksjonarius og engasjert bodgjeving! Følg med i Fjordabladet for annonsering.

14.06. Oppmøte kl. 18.00 på busstasjonen. Gunnhild og Gudmunn Humborstad i Hornindal. Rhododendronblomstring, skjeldne tre, og uvanleg flott hageanlegg. Arrangementet kan bli endra, men dette blir annonsert.

AUGUST

12.08. 1000 åpne hagar i Eid. Hagevandring i fleire hagar i Eid. Dette er eit landsomfattande arrangement i regi av Hageselskapet. Sjå annonse.

SEPTEMBER

06.09. Oppmøte kl. 18.00 på busstasjonen. Vi besøker Unni og Arne Krumsvik på Haugane. Dei har ein hage med mykje steinbed, murar, viser bruk av stein i hagen.

OKTOBER

Årsmøte

NOVEMBER

Adventsmøte med laging av kransar og juledekorasjonar.

Vi i hageselskapet Eid hagelag ynskjer alle velkomne på arrangementa våre, uansett om du er medlem eller ikkje. Ver merksam på at det kan kome fleire hagevandringar i tillegg til dei som blir annonsert her. Nærare informasjon om arrangementa våre blir alltid kunngjort i Fjordabladet, på bloggen vår www.eidhagelag.blogspot.com, på Eid hagelag si side på Hageselskapet sine nettsider eller på Facebookgruppa Hageselskapet Eid hagelag. Nytt i år er hagemarknaden vi skal ha i byrjinga av juni. Vi har ikkje alt i boks enda, men har tenkt å samle fleire spennande ressurspersonar og aktivitetar, og vi vonar dette kan vekke hageinteressa til Eidarane. Håpet er at vi får fint vårvær, men vi tåler også ei regnskur! I år deltek vi også på 1000 åpne hagar, og det gler vi oss til. Da vil vi ynskje alle eit GODT HAGEÅR, og VEL MØTT!

Med helsing styret i hageselskapet Eid hagelag.

Snart er det vår......

Populært adventsmøte på Kyrkjetunet

2011-12-06T10:47:00.006+01:00

Den 24.november arrangerte vi ein kreativ kveld i lag med blomsterdekoratør og gartnar Johannes Nome, der vi verkeleg fekk utfalde oss med edelgran, kongler, kornellgreiner i både raudt og grønt, vakre kvite juleroser og masse anna flott. Johannes viste oss nokre grunnprinsipp for å lage både kransar og andre dekorasjonar, og demonstrerte teknikkane sine for oss. Han var også veldig behjelpeleg med å gå rundt og bistå dei om lag 25 kreative damene som hadde møtt opp. Vi hadde sett grensa ved 25, og det heldt akkurat med den store salen på Kyrkjetunet. Dette freistar til gjentaking neste år.

Her kan du sjå nokre glimt frå kvelden, og fleire av dei fine produkta: (alle bilete er tekne av Anna Wuttudal)

Praktisk info vedr. adventsmøtet torsdag 24.

2011-11-21T14:40:00.002+01:00

Hei alle påmeldte deltakarar. Vi blir om lag 25 stykke på torsdag, så det blir fullt hus. Det er flott, vi trur det blir kjekt:-)

Her kjem litt praktisk informasjon:

Johannes Nome ber oss ta med saks og avbitertang om vi har. Ta også gjerne med eigne ting å lage av, alt frå hagen og naturen kan i prinsippet brukast slik eg forstår det. Ta også gjerne med “stæsj” og pynteting sjølv, om du ynskjer spesielle ting. Han har litt til sals, men held seg til det enkle. Han anbefaler også å ta med eigen adventsstake som egnar seg til pynting, da han berre har nokre lyshaldarar med seg.

Hugs: møtet byrjar kl. 19.00. Ta med kontantar til kjøp av utstyr, og til lodd. Kaffe/te og kaker gratis.

VEL MØTT!

ADVENTSMØTE 24.november

2011-11-05T08:19:00.007+01:00

Det er snart vinter, og vi nærmar oss advent og jul. I år har vil vi ha eit adventstreff der vi kan lage dekorasjonar og kransar for å pynte både inne og ute.

Vi er så heldige å ha fått blomsterdekoratør Johannes Nome til å kome og hjelpe oss med dette. Han har med pyntegrønt for salg, i tillegg til anna utstyr som vi treng, samt ein del pynt og dekorasjonselement. Du kan også gjerne ta deg ein tur i hagen eller i skogen og plukke med kongler, krokete greiner, borkbitar og anna som du har lyst til å lage noko av. Nissar, soppar og liknande som kan egne seg er også lurt å ta med.

Det blir inngangspengar på 150 kr. for ikkje-medlemmer og 100 for medlemmer. Da får du kaffe/te og noko å ete gratis. Lotteri.

Møtet blir på Eid kyrkjetun kl. 19.00. Merk! PÅMELDINGSFRIST den 17.11. på telefon til nokon av oss i styret eller på epost: eidhagelag@yahoo.no.

Herdis har telefon 95056239.

VEL MØTT!

Kva skjer og har skjedd?

2011-10-31T22:01:00.007+01:00

ÅRSMØTET I EID HAGELAG
Først vil eg kort informere om årsmøtet i Eid hagelag den 18.10. Da valet var unnagjort sat vi att med eit styremedlem mindre. Vi vil takke Elin Grinde for ein kjempebra innsats i styret i fleire år. Ho har vore sekretær, og har teke mykje ansvar for arrangementa våre, både når det gjeld det praktiske og ikkje minst ved å bidra med kreative idear! Tusen takk for innsatsen Elin. Vi håper vi får sjå deg på tilstelningane våre i framtida også.

Vi fekk inn ein ny vara, og det er Olav Lefdal. Takk til deg som sa ja til å stille. Vi kjem til å måtte kalle inn vara fast på styremøta framover fordi vi manglar eit styremedlem. Ellers held vi fire fram i styret: Anna Wuttudal, Merethe Kjølberg, Linda Honningsvåg og Herdis Bergset som leiar. Marit Frislid held fram som ekstern kasserar.

FYLKESÅRSMØTE
Ellers deltok Anna, Linda og Herdis på årsmøtet i fylkeslaget i Hornindal sist helg. Der fekk vi undervisning i å legge inn informasjon på den nye nettportalen til Hageselskapet. Vi i vårt lokale hagelag har vår eiga side der vi kan legge ut informasjon om lokale arrangement etc. Ta ein kikk på den, vi kjem til å legge ut den same informasjonen på begge stadene framover, og så får vi vurdere om bloggen blir overflødig.

HAGETUR TIL ENGLAND
Så vil eg til slutt informere om ein hagetur til England til våren. Tidlegare sekretær Gro Haga i Hageselskapet Sogn og Fjordane er i gang med planlegginga av ein eksklusiv hagetur til England i pinsa 2012. (24.5.-29.5.). Dette er saksa frå informasjonen vi fekk på årsmøtet i helga: "Vi satsar på å besøkje nokre av dei mest profilerte hagane i England. Satsar på hagar som ein ikkje når så lett via offentleg kommunikasjon frå London"

Dette er ein unik sjanse til å få ein reint hagerelatert tur i hageverdas mekka: England. Nokre av desse hagane er ikkje så lett tilgjengelege for turistar utan bil, fordi dei ligg avsides til. Det er snakk om Wisley Garden, Sissinghurst, Great Dixter og små, private hagar. Dei må ha med minst 20 for at det skal bli noko av. Pris er ikkje fastsett enda, det kjem etter kvart når ting er litt meir spikra.

Wisley Garden finn du informasjon om her: http://www.rhs.org.uk/gardens/wisley.
Sissinghurst: http://www.nationaltrust.org.uk/main/w-vh/w-visits/w-findaplace/w-sissinghurst-castle/w-sissinghurstcastlegarden-photo_gallery.htm
Great Dixter: http://www.greatdixter.co.uk/gardens.htm

ÅRSMØTE 18. OKT.

2011-10-03T10:32:00.003+02:00

Nå er det tid for årsmøte igjen, og dette blir på Eid rådhus, i lokala til det gamle legekontoret.

Klokkeslett 19.30. Merk deg at du må gå inn frå baksida av rådhuset!

Det blir dei vanlege årsmøtesakene, og så vil Elin Grinde vise oss bilete frå alle arrangementa vi har hatt det siste året. Du vil få eit gjensyn med kjekke hageopplevingar, og kanskje få eit glimt av deg sjølv eller kjende! Vi har nokre flinke fotografar i styret, og dette blir garantert ei oppleving av frodige bed og fargerike blomar ein mørk haustkveld. Kaffi og kaker blir det også.

Har du forslag og idear til ting du saknar, lovar vi å vere åpne for desse! Vi i Eid hagelag har ein ambisjon om å auke medlemstalet i året som kjem, og treng kreative forslag for å få til dette.

VEL MØTT!

2011-09-21T21:29:00.007+02:00

Roseglede i Naustdal

”Roser er som barn. De er deilige, de er smukke, de krever omsorg, og de giver oss stor livskvalitet!”
Matias Hukseth gjer hagebokforfattar Lisbeth Krapper sine ord til sine og er sjølv eit lysande eksempel på kor mykje glede ein hage kan gje. ” Å ha hage som hobby er terapi for både kropp og sjel, stråler roseentusiasten. Han fortel at han driv for seg sjølv som målar og kan vere lut lei av sure kundar og i dårleg humør når han kjem heim frå jobb. Men når han kjem seg ut i hagen, er alt gløymt.Hagestell er medisin for alle pengane.

Då Eid hagelag vitja rosehagen til naustdalingen, fekk vi varm mottaking av heile familien og grundig orientering frå Matias, som hadde sett av god tid til å vise oss rundt. Han har eit nært forhold til, og mykje kunnskap om rosene sine og fortalde entusiastisk om alt frå gjødsling til laging av stiklingar.

Matias si erfaring er at gammal sauemøkk, helst to-tre år gammal, er god grunngjødsling i botnen av blomsterbeda. Eit anna litt meir uvanleg triks er å bruke litt dun. I tillegg til å gje jorda meir struktur, vil det også bli frigitt mineral som plantane kan nytte. Så har du ei gammal dundyne til overs, veit du no kvar ho kan gjere nytte for seg.

Tidleg om våren er Matias sin hage full av påskeliljer og andre løkvekstar. Når desse er avblomstra, tek roser og andre vekstar over. Ein flott hagedam er også ein del av hageanlegget til familien Hukseth i Naustdal.

Generell gjødsling i beda er 1 ss fullgjødsel per 30 cm x 30 cm, 1. mars, 1. april, 1. mai og 1. juni.
Rosene held han fri for lus hovudsakleg ved å spyle med kaldt vatn.

Matias mista 250 roser sist vinter, men har allereie erstatta dei med 170 nye. Han er ikkje så nøyen på merka hardførheit når han skal kjøpe roser. Hans erfaring er at h-merkinga ofte ikkje stemmer i vårt område, og han kjøper dei rosene han liker aller best. Og det har etter kvart blitt mange.

Hagen til Matias er stor og timane gjekk fort i godt hageselskap, men ikkje skulle vi gå svoltne derifrå. Frua til Matias hadde kokt ei stor gryte med elgsodd som vi fekk servert ute i den vakre hagen. Elgsodd var eit nytt og velsmakande bekjennskap for mange av oss. Nydeleg!

Så var det meir roser og deretter kaffi og kaker til demonstrasjon av korleis ein kan lage eigne rosestiklingar. Og vi reiste ikkje tomhendte derifrå. Både plantar, røter og eit variert utval med laukar delte Matias ut med raus hand.

Hagedamene frå Eid var også ein kort tur innom nabohagen der det mellom anna var eit imponerande skuggebed dominert av mange ulike typar hosta.

Vi var også innom diverse hagebutikkar og fylte bilen til randen med godbitar før vi vende nasen heimover.

Hagevandring hjå Elisabeth Krumsvik

2011-09-12T10:21:00.003+02:00

Torsdag 15. september tek vi turen til Elisabeth Krumsvik på Hjelle.

Hagelaget har besøkt henne tidlegare, og denne hagen er vel verdt ein ny visitt!

Dette blir nok årets siste hagevandring, så vi håpar mange har lyst å ta turen saman med oss på torsdag.

Det blir som vanleg lotteri og servering av kaffe med noko å bite i.

Møt opp på busstasjonen på Nordfjordeid kl 18, så køyrer vi i lag.

Hagevandring til Naustdal i Sunnfjord

2011-08-04T20:49:00.005+02:00

Laurdag 13. august tek vi turen til Naustdal i Sunnfjord. Då er det hagane til Matias Hukseth og nabohagen til Arnfin Grøneng og Marit Sæterlid vi skal besøkje.

Roser er ein spesialitet i begge desse hagane, så dette vert ein dag med roser som fokus.

Vi tek også turen innom Rebakken hagesenter på vegen

Det blir som vanleg ein kaffetår i ein av hagane, men turen er lang, så det er lurt å ha med seg nistepakke.

I kaffipausen blir det også lotteri. Inntekta til lotteriet går til drift av hagelaget, så dess fleire lodd, dess meir moro kan vi finne på !

Oppmøte på busstasjonen på Nordfjordeid kl 09.00.
Vi fyller bilane og køyrer i lag.

1000 åpne hagar

2011-08-01T20:36:00.003+02:00

14. august arrangerer Hageselskapet 1000 åpne hagar i heile landet.

Eid hagelag har ikkje hatt kapasitet til å engasjere seg i denne saka i år, så hittil er der desverre ikkje registrert hagar i Eid kommune som er åpne denne dagen.

Heldigvis finst der mange hagar i overkomeleg nærleik som kan besøkjast også av Eidarar.
Bak denne linken finn du private hagar i Sogn og Fjordane som er åpne denne dagen. Har du lyst på hagevandring, så er det berre å ta turen til ein eller fleire av desse hagane den dagen.

Med Naturvernet på tur søndag 19.juni

2011-06-14T20:47:00.005+02:00

NATURVERNFORBUNDET I EID ØNSKER HAGELAGET MED PÅ SJØLVSTUDIE TUR TIL UTE/INDRE LOTSBERG

DETTE OMRÅDET ER BLOMSTER RIKT OG SPENNENDE. BILDA ER FRÅ SAMME OMRÅDE I MAI.

TID:19 JUNI på en søndag.

START FRå IDRETTSHALLEN KL.14.00

KONTAKTPERSON: OTTAR ØIEN E-POST oreidaro@online.no

mobil99203228 H.TLF.578862578

Hagevandringar i Gloppen 28. mai

2011-05-31T13:27:00.012+02:00

Denne laurdagen var sett av til hagevandringar i Gloppen. Vi hadde planlagt å vandre i hagane til Svanhild og Svein Ryssdalsnes i Åsen og til Aslaug og Olav Moen på Arnestad.

Vi starta i hagen til Ryssdalsnes, og der venta det oss eit vanvittig blomsterflor av Rhododendron i alle fargar og variantar. Bildet under viser oppkøyringa til huset deira.

Ved inngangspartiet fann vi eit bed med ulike steinbedplantar, og samlinga med ulike Lewesia var eit flott syn mot bergknausane.

Nydelige fargar mot gråstein og grønt.

Det var tydeleg at vertskapet var glad i stein i hagen. Det var mange døme på kreativ bruk av stein i hagen. Legg spesielt merke til den flotte steinen som er bygd inn i ein vegg ved sitjeplassen.

Ein fantastisk flott uteplass med ekte maleri på veggen.

Vi var så heldige å få ta lunchpausen og lotteriet vårt i denne fantastiske sitjekroken. Vertskapet sit til venstre på biletet.

Før vi reiste vidare til Moen, så fekk vi ein liten kikk i nabohagen. Det er hagen til Bjørn og Borghild Pettersen.

Her var det også flotte fargar i massevis.

Ein søt liten alpeklematis kosar seg på veg opp i eit lite tre.

Også i denne hagen er prega av mykje berg og stein.

Den koselige vesle hytta var eit fint blikkfang i hagen.

Den siste hagen vi besøkte denne dagen var hjå Moen på Arnestad.

Også her var det massevis av stein. Den fantastiske muren som danna hagen framfor huset var litt av eit syn.

Oppå muren hadde paret sine to hundar den mest eksklusive hundegarden vi nokon gong har sett. Der var det blomstrande frukttre inne i innhegninga og ei fantastisk utsikt!

Ved sidan av hundegarden var det bygd ein sitjeplass, og under den var det laga plass til kompostannlegget bak flotte blå dører.

Der var fleire slike fine laftahus i hagen. Dei har Olav Moen bygd sjølv i garasjen sin. Imponerande flott handtverk, som virkelig gav hagen eit fint særpreg.

I bakhagen var det sitjeplass med utepeis og kort veg til kjøkkenhagen.

Kjøkkenhagen og drivhusa var favorittplassen til Aslaug. Her dyrka ho fram sine eigne plantar, og masse grønsaker og salat.

Langs drivhusveggen var det planta peonar, som heilt sikkert vil bli eit imponerande skue når ein kjem litt lenger utpå sommaren.

Dagen vart avslutta med planteshopping hjå Vereide blomster i Sandane sentrum. Fleire av oss fekk handla flotte og spennande plantar til våre eigne hagar.

Hagevandringar på Sandane 28.mai

2011-05-19T23:00:00.006+02:00

Laurdag 28. mai tek vi turen til Sandane.
Då er det hagane til Svanhild og Svein Ryssdalsnes og Aslaug og Olav Moen vi skal besøkje.

Oppmøte på busstasjonen på Nordfjordeid kl 10.00.
Vi fyller bilane og køyrer i lag.

Hagen til Ryssdalsnes har Eid hagelag besøkt tidlegare, men det er ein flott hage som er vel verdt å sjå igjen. Her tek vi kaffipause med lotteri før vi reiser vidare til Moen.

Etter hagebesøka tek vi turen innom Vereide blomster i Sandane sentrum. Her vert det høve til å handle bilane fulle.

Velkommen til ein triveleg hagedag!

Vellukka hageseminar i Operahuset Nordfjord

2011-05-05T14:26:00.016+02:00

Hageseminaret som Eid hagelag arrangerte i samband med Hageselskapet i Sogn og Fjordane og Husbanken gjekk av stabelen i Operahuset Nordfjord 30. april.

Veiret var utruleg fint denne dagen, og likevel var det over 70 hageglade som ville være med på seminaret vårt.

Eit par blide damer gav gjestane allereie i billettluka kjensla av at dette ville bli ein trivelig dag.

Kinosalen i Operahuset Nordfjord var heilt suveren som kurslokale. Det var mørkt nok til at gjestene gløymde det fine veiret utanfor, og kunne lene seg godt tilbake i dei gode seta og kose seg med dei ulike foredraga for dagen.

Jostein Kjøsnes og leiar i Eid hagelag, Herdis Bergset ynskte gjestene velkomne.
Kjøsnes fortalte litt om bakgrunnen for at Husbanken var med og støtta seminaret.
Husbanken er oppteken av at hus og eigendom skal være universellt utforma. Ein del av det seminaret handla om var nettopp det å gjere det lettvindt og godt tilgjengelig for alle både i hus og på eigendomen.
Her er foredragshaldarane samla, Jostein Kjøsnes (profesjonell synsar og leiar i Hageselskapet Sogn og Fjordane), Brynjulf Litlere (tidlegare fylkesgartnar og seinare tilsett på Arboretet på Milde og Lars Fisher (Landskapsarkitekt i Grindaker AS).

Brynjulf Litlere viste bilder frå turane han har hatt til Japan. Gjennom arbeide med å skape ein japansk hage i Arboretet på Milde, fekk han høve til å reise til Japan og sjå på hagar. Ein del av bileta derifrå hadde han samla i ein flott powerpoint som vi fekk høve til å sjå. Trur nok det er fleire enn underteikna som fekk lyst på ein hagetur til Japan etter dei bileta.

Etterpå fekk vi sjå ein presentasjon av arbeidet med å skape den japanske hagen i arboretet. Det var intressant å sjå korleis ein slik hage vart bygd frå grunnen av. Sjølv om dette var ein stor, offentleg hage, var det mange tips og mykje inspirasjon til eigen hage i bilda vi fekk sjå.

Lars Fischer tok for seg planlegging av hagen frå ende til annan. Vi fekk tips om korleis planlegge forhage, inngangssoner og sitjeplassar, slik at dei ser innbydande ut og har plass til alle dei elementa vi ynskjer å ha plass til i hagen.

Han var også oppteken av at hagen, og då spesielt inngangspartiet skulle være universelt utforma. I det ligg at ein gjer huset tilgjengelig for alle. Ein skil ikkje brukargruppene med f.eks fullestolramper, men heller satsar på å leggje inngangspartiet i gateplanet, slik at alle kan komme seg inn i huset. Ein kan for eksempel legge inn ledelinjer, slik at det er lett for svaksynte å sjå trappetrinn og retning på gangvegen.

I lunchpausen fekk vi servert gryte med ris og salat. Til dessert var det deilig karamellpudding. Praten gjekk livlig, så det var tydeleg at folk hadde felles interesser å prate om.

Lars Fisher hadde laga eit forslag til korleis ein kunne utforme ei vanskeleg tomt. Tomta tilhøyrer familien Oppedal og ligg bratt til i Myklebuståsen på Nordfjordeid.

Forslaget Fischer hadde teikna, var basert på alle dei tipsa vi hadde fått i løpet av seminardagen. Det var intressant og lærerikt å høyre korleis ein profesjonell arkitekt tenkjer når han skal utforme ein hage

Ein fornøygd gjeng. Merete Kjølberg (styremedl. i Eid hagelag), Herdis Bergset (leiar Eid Hagelag) og Jostein Kjøsnes (leiar Hageselskapet Sogn og Fjordane)

Eit par kjekke jenter i kiosken sørga for at vi kunne få kjøpt kaker, frukt og noko å drikke i løpet av dagen.

Fotokurs del 1

2011-04-08T09:28:00.008+02:00

Del 1 av fotokurset gjekk av stabelen i 7.april.Kurset er lagt opp til at det skal passe for flest mogeleg av oss amatørhagefotografar. Kurset er lagt opp som samtaler rundt dei ulike bileta, der deltakarane er delaktige.

Som i fjor var det Tim Øsleby som leia kurset. Nokre av deltakarane hadde sendt eigne hagebilder, og desse vart brukt som utgangspunkt for kurset.

Tips:
-unngå at motiv og bakgrunn konkurrerer.
-Bestem deg for kva som er motivet og fokuser på dette. I eit bed er det mange plantar, og dei kan fort konkurrere om auget si merksemd.
-Godt fotolys i hagen er opphaldsveir med såpass mykje lys at objekt kastar skugge, men ikkje sollys. Godveirsdagar med tyntskydekke er fint fotoveir.
- Om du ynskjer slørete/utydelig bakgrunn mot eit tydelig hovudmotiv når du fotograferer på nært hold, kan du øke blendaråpninga om kameraet ditt har den funksjonen.
-Bruk geomettriske former og linjer for å skape ro i bildet.

Dei gode tipsa vi fekk i fjor gjeld selvfølgelig fortsatt. Dei kan du lese om i dette blogginnlegget.

Ein liten, men intressert gjeng møtte på kurset. Mange gode tips vart notert flittig.

Neste veke vil eit ta for seg litt meir om korleis ein kan forbetre bilder ein har tatt i redigeringsprogram på data. Ein vil gå ut frå enkle program som ein vil kunne laste ned gratis frå nettet. Om du er intressert, men ikkje var på gårsdagens kurs, er du likevel hjarteleg velkommen torsdag 14.april kl 19.00

Hageseminar - også for dei som ikkje likar hagearbeid.

2011-04-05T11:54:00.013+02:00

30.april arrangerer hagelaga i Nordfjord og Hageselskapet i Sogn og Fjordane hageseminar med fokus på uteplassar og inngangsparti. Arrangementet vil gå føre seg i kinosalen i Operahuset Nordfjord på Nordfjordeid frå kl 09.30 til 17.00.

Tema for dagen vil være hageplanlegging og endring av hagen med fokus på funksjonell arkitektur og enklare drift og vedlikehald. Arrangementet vil være intressant for alle som har hus og hage, og ikkje minst for dei som planlegg å skaffe seg hage, eller som ynskjer å gjere noko med den eksisterande hagen. Det vil verte fokus på gode løysingar for ein god og lettstelt hage. Ein vil få sjå før og etter bilete av hageløysingar.

Det er ofte små og enkle grep som skal til. Får ein ”orden” på inngangsparti og opphaldsplass ordnar resten av hagen seg i stor grad sjølv.

Opplevinga av å kome heim, og vere der, må stå i forhold til arbeidet med å halde hagen slik. Vi vil leggje stor vekt på universell utforming og tilgjengelegheit.

Faglege aktørar på samlinga blir:

Lars Fischer. Landskapsarkitekt og partner i Grindaker as, eit av dei leiande lanskapsarkitektkontora her i landet. Er i tillegg professor for miljø– og biovitenskap på Ås, med ansvar for bustadområde. Fischer vil belyse krav i Plan- & Bygningsloven.

Han vil elles snakke om:

· Hagens inndeling i ulike hagerom, med spesielt vekt på inngangspartiet og tilgjengelegheit.

· Element i hagen og materialbruk.

· Vegetasjon i hagen, korleis få frodigheit spesielt i dei delane av hagen der det er mykje skugge.

Brynjulv Litlere. Tidlegare fylkesgartnar i Hordaland og Sogn og Fjordane. Seinare tilsett på arboretet på Milde. Spesialinteresse er vegetasjon og Japan- inspirerte hagar. Hagar der mellom anna stein og grus er viktige, effektfulle og vedlikehaldsvenlege materialar. Spesielt i fellesareal er dette undervurdert her hjå oss og bør få eit sterkare fokus.

Jostein Kjøsnes. Leiar i hageselskapet Sogn og Fjordane. Presenterar ein del ulike hage og nærmiljøprosjekt (fellesareal) av den røynde landskapsarkitekten og pedagogen Morten Grindaker.Hovudbodskapen er at hage og gode nærmiljø er meir enn vegetasjon.Det er mellom anna løysing, form og innhald.Synleggjort med før og etter illustrasjonar/ bilde. Fellesareala bør også ha eit meir sentralt og brukareigna areal enn ein ofte ser. Enklare vedlikehald og drift er eit anna viktig tema. Opplevinga av å komme heim, og vere der, må stå i forhold til arbeidet med å halde det.

Dette er et opplegg med innhald som tidligare ikkje har vore gjennomført. Førebuinga er krevjande då det må lagast ein del nytt, inspirerande og pedagogisk materiale.
Erfaringane vil bli evaluert og vil ha stor overføringsverdi i andre tilsvarande prosjekt i Hageselskapet og Husbanken, som også er medarrangør i prosjektet.

Vi ynskjer at hagen skal være ein god plass for rekreasjon og glede, ikkje berre arbeid og slit. Gode, kreative løysingar vil være med på å skape ein hage som gjev rom for meir enn arbeid. Vi satsar på å få til eit spennande arrangement for både nye og gamle hageeigarar og for alle andre intresserte.

Frist for påmelding onsdag 28. april

Pris kr 300,- pr. pers. Inkludert lunch. Betalast til kontonr. 3790 10 30929, eller ved frammøte.

Intresserte kan ta kontakt med:

E-post: eidhagelag@yahoo.no

Telefon: Eid hagelag: Herdis Bergset, tlf. 95056239

Stryn hagelag: Synnøve Beinnes, tlf. 90869077

Vågsøy hagelag: Torunn Utnes, tlf. 95924701

Gloppen hagelag: Turid Bøyum, tlf. 92841292

Fotokurs

2011-03-25T17:41:00.004+01:00

I fjor hadde vi ein svært trivelig fotokveld med Tim Øsleby som kurshaldar. Han er leiar i Nordfjord Fotoklubb.

I år har vi tenkt å ha heile to kveldar. Det er 7.april og 14. april som er sett av til dette og begge kveldane startar vi kl 19.oo i Lars Lunde sine lokale i Eidsgata 53.

Kurset vil kunne ta for seg det mest grunnleggjande for digital fotografering på generelt plan. Dvs korleis få bilder inn på pc, korleis holde orden på bileta, og korleis bruke dei.

Det blir råd om korleis ta betre bilete, generelt og blomsterbilete generelt. Stikkord: Tenke lys og bakgrunn, kva ein tek med i biletet osv. Kurset vert lagt opp som ein "samtale rundt bilete", slik at ein viser ulike bilete, og diskuterer og lærer ut frå desse. Alle bileta vil ha tema frå hagen

Korleis kvart enkelt kamera virkar blir for mykje å gå inn på på slike kveldar, så her bør deltakarane lese eigen brukarrettleiing for kameraet.

Pris for medlemmer kr 150,- og ikkjemedlemmer kr 200,- pr kveld.

Det vert sjølvsagt ein kaffikopp med noko attåt.

Beskjæring av frukttre og bærbusker

2011-03-17T22:11:00.005+01:00

Torsdag 17. mars inviterte hagelaget og Eid bondelag til kurs om beskjæring av frukttre hjå Anna Wuttudal og Gunnvald Hildenes på Hildenes.

Det var Rune Vereide frå Gloppen som tok turen over fjorden for å undervise oss. Til dagleg jobbar han ved Norsk Landbruksrådgjevning, så han hadde virkelig mykje å lære vekk om dagens tema.

Demonstrasjonen starta med nokre ord om kva reiskapar som eigna seg til denne typen arbeid.

Dette morelletredet har fått vokse relativt fritt i nokre år, så her skulle Rune Vereide få boltre seg fritt med sekatør og sag. Mange forgreiningar gjer at lyset ikkje slepp godt inn i tredet, og ein del av desse forgreiningane bør vekk. Greiner som er skadde, eller som gneg mot kvarandre må fjærnast.

Eit godt tips undervegs er å ta eit steg tilbake undervegs, og studere tredet, slik at ein får eit godt overblikk over korleis arbeidet skrid fram.

Eit prinsipp Vereide tykte var verdt å prøve å halde seg til var å la ein hovudstamme vekse opp til ynskt trehøgd. Vidare fokuserte han på kor viktig det var å få godt med lys inn i trekrona.

Om du ser godt etter på biletet ser du at greina han held handa på no er klipt ganske langt frå stammen (omlag ei saksebreidd). Grunnen til at han klipper den såpass lang, er at då kan nye skot komme frå greinstammen som står att. Dersom det skulle komme bakterier i "såret", vil det ikkje så lett angripe stammen som greina veks ut frå.

Det er ikkje berre klippereiskapa som skal være gode. Han hadde med seg ein god stige som eigna seg svært godt når ein skal komme nær tredet.Den har tre føter, og er lett å få plassert trygt under tredet.

Rune vereide og leiaren i hagelaget, Herdis Bergset i ivrig diskusjon ved kaffibordet etter demonstrasjonen.

Vereide anbefalte ei bok som heiter Nyttedyr, skadedyr og sjukdom i frukt- og bærhagen, skriven av Olav Sørum.

Ein stor takk til vertskapet, Anna og Gunnvald, som var så gjestfrie og stilte både frukttre og stova si til disposisjon! Det gjorde utruleg godt med traktorvafler og ein god og varm kopp kaffi etter ei noko kjølig økt utandørs!

Lær om beskjering av frukttre og bærbusker

2011-03-12T09:07:00.003+01:00

Sjølv om snøen ligg tett i bygda for tida, har mange hageeigarar byrja å tenke på vårarbeidet i hagen. Så lenge snøen ligg er det perfekt å bruke tida på å hente inn kunnskap om arbeidet som ventar.

Torsdag 17. mars vert det demonstrasjon av beskjering av frukttre og bærbusker ved Rune Vereide. Han jobbar til dagleg ved Norsk Landbruksrådgjeving.

Demonstrasjonen vert på Hildenes hjå Anna Wuttudal og Gunnvald
Hildenes.

Oppmøte på rutebilstasjonen på Nordfjordeid eller direkte på garden klokka 18.00.

Lotteri og servering av traktorvaflar.

Alle er velkomne.

Referat frå vårmøtet med Gro Haga

2011-03-09T12:49:00.005+01:00

Den 10. februar starta vi med ein liten forsmak på våren, og dei om lag 11 frammøtte fekk ei grundig og svært informativ innføring i kunsten å får fram plantar av frø, både sommarblomster og grønnsaker. Gro Haga er bondekone frå Viksdalen, og i tillegg sekretær i fylkesavdelinga til Hageselskapet. Ho har sådd det meste, og har mange års erfaring. Ikkje minst var det nyttig å få tips og råd frå ei som i mange år har sådd og dyrka i vestlandsklima, noko som av og til kan by på spesielle utfordringar.

Nokre av råda underteikna noterte seg var:

så i vanleg jord av middels kvalitet, ikkje såjord. Da treng du ikkje prikle med ein gong plantane kjem opp (f.eks. frå Plantasjen, den er passe sterk, ikkje FK si, den er for kraftig)
bruk raud Superba og kalksalpeter til gjødselvatn
skal du dyrke grønnsaker må du ha god jord, tilfør husdyrgjødsel og kompost
anbefalte grønnsakslag er grønnkål "Redbor", fin til snitt i tillegg til mat
Valsk bønne eller bondebønne høver fint i vårt klima, og gir god avling. Brukast til det meste, wok etc.
Så gjerne låge sortar av sukkerert, dei er lettare å binde opp
Sommarfloks er ein fin sommarblomst som taklar regn
Anisisop kjem gjerne igjen som staude
Blåkorg eller ageratum finst også i høg utgåve. Veldig flott og dekorativ i bedet!
Bakkestjerne (Erigeron) Profusion kan du så og ha i mange år om du overvintrar den inne, vakkert vell av blomster

Det å prøve seg på nye sortar er noko Gro likar godt, ho testar ut korleis plantane trivst hos henne, og sår dei igjen om det er vellykka. Ho viste mange bilder frå hagen sin, og maken til frodig blomsterflor skal du leite lenge etter. Dette var ein inspirerande kveld for oss planteglade, og eg vil tru at det er fleire enn eg som fekk lyst til å prøve seg på å så meir enn før, og ikkje minst andre planteslag enn dei vi er vane med.

Såing av stauder og sommarblomster

2011-02-02T00:17:00.005+01:00

Såing av sommarblomster og Stauder ved Gro Haga.

Torsdag 10. februar er det sesongåpning for Eid hagelag. Då arrangerer hagelaget foredrag om Såing av sommarblomster og stauder.

Foredragsholdaren er Gro Haga frå Viksdalen. Ho er sekretær i Hageselskapet Sogn og Fjordane og leiar av Gaular hagelag. Ho var hjå oss i fjor også. Då var det støyping av hypertufa som var temaet. Ho har vore hageintressert heile livet og har massevis av eigne erfaringar som ho kan dele med oss frå sin eigen hage i Viksdalen.

Det er litt i tida å dyrke sine eigne grønsaker. Gro Haga er spesielt intressert i dette, og vil ta for seg det også under foredraget.

Foredraget vert på Stokkenes gjestegard kl 20.00.

Vi håpar mange vil ta turen. Vi trur det blir ein trivelig og inspirerande kveld sånn heilt i starten av hagesesongen. Ein treng ikkje vere medlem for å komme, alle er like velkomne.

Sjølvsagt vert det som vanleg lotteri, kaffi og noko å bite i .

Kommuneblome for Eid!

2010-12-31T14:45:00.006+01:00

Nå er prosessen godt i gang, og DU kan vere med å bestemme kva for ein av dei fire kandidatane som blir blomen som skal vere med å profilere kommunen vår. Kandidatane er:

Olavsstake (Moneses uniflora)
Bukkeblad (Menyanthes trifoliata)
Forglemmegei (Myosotis)
Bergfrue (Saxifraga cotyledon)

Les meir på Eid kommune sine sider. Her kan du også stemme.

Vi vil nytte høvet til å ynskje alle hjarteleg velkomne på dei ulike arrangementa våre i året som kjem. Vi startar alt den 10. februar kl. 20.00 på Stokkenes gjestegard med temaet frø og såing av stauder, ved fylkessekretær Gro Haga.

Vi i styret i Eid hagelag ynskjer alle som ser innom her eit godt, frodig og blomstrande NYTT ÅR I 2011!

Trivelig julemøte

2010-11-23T15:33:00.006+01:00

Torsdag hadde vi eit svært trivelig julemøte der Fred Arild Grøneng frå Florø viste lysbilder frå ulike hagar han har besøkt på vestlandet. Vi var ikkje meir enn 14 frammøtte, men det hindra oss ikkje i å få ein kjempetrivelig kveld med julegløgg, kaffi, kaker og stearinlys på borda.

Dei fleste bileta Grøneng viste var frå hagar han vitja medan han guida ein journalist frå Norsk hagetidend som skulle lage reportasjar frå vestlandshagar.
Nokre av hagane var ikkje ukjende for medlemmene. Blandt anna såg vi bilete frå hagane til Eva Hagen, Svanhild Ryssdalsnes og Terje Haddal, og alle desse hagane er hagar som hagelaget har vitja i løpet av dei siste åra. (Ryssdalsnes sin hage kjem faktisk også på neste års program)

I pausen overrekte hagelaget sin leiar Herdis Bergset, ein St.Paulia som takk for at han tok turen til Eid. Det Herdis ikkje visste var at ho hadde plukka ut ein av Grøneng sine favorittar blandt inneplantar, og det er jo alltid trivelig når ein treff blink med takkegåvene :)
Grøneng viser fornøygd fram St.pauliaen.

Lokalet var pynta med lilla serviettar, vintergrønt, lysestakar og dekorasjonar så det vart reine adventsstemninga.

Styret i Eid hagelag takkar for ein trivelig hagesesong, og ynskjer med dette ei retteleg god jul og godt nyttår til alle medlemmene. Vi håpar at neste års program som de finn i sidekolonna på bloggen vil friste mange til å følge oss gjennom neste sesong også.

Julemøte med interessant gjest torsdag 18. november

2010-11-04T13:14:00.010+01:00

I år har vi bestemt oss for å lage ein liten variasjon på julemøtet vårt, og har fått tak i ein person frå Florø, som skal snakke om vestlandshagar, og ikkje minst vise flotte hagebilete til lyst, nytte og ikkje minst inspirasjon!

Gjesten heiter Fred Arild Grøneng, og han vil vise oss foredraget "Vestlandshagar - ei reise i hagar på Vestlandet og plantene der."

Grøneng har vore aktiv i Hageselskapet sidan 1990 og har i samband med det besøkt
mange hagar. Som plantesamlar er det plantene og samplantingane som er
det mest interessante for han. Han tykkjer hagerommet, natur- eller menneskeskapt,
er interessant.

Hagane i foredraget finn ein i tre Vestlandsfylke, og bilda
er tekne på ulike hageturar over fleire år og på to reportasjereiser for
Norsk Hagetidend saman med Bjørg Raybo. Foredraget er meint å presentere
hagane som type og plantene som er valde for å skape hageuttrykket. Såleis
vil foredraget gje tips både om aktuelle planter og kor dei vil trivast i
hagen.Vestlandshagen kan både vere ei utfordring og ei velsigning å skape,
for klima og jordsmon er både utfordrande og gunstig på same tid i våre
strók.

Han har også arrangert tematurar til Kina og dreg på sin femte tur i påska
2011, denne gongen også med cruise på den Gule Flod og Tibet lagt inn. Det
vil også bli plass til ein kort presentasjon av turprogrammet på møtet. Om du tykkjer det høyrest spanande ut, kan du ta ein kikk på denne linken.'

Møtet vert på Stokkenes gjestegard torsdag 18. november kl 19.00.
Vel møtt til ein trivelig kveld med servering og lotteri i god hagelagsstil :)

Eid kommune er nå på banen!

2010-10-28T11:23:00.007+02:00

Straks etter at forrige litt frustrerte innlegg vart skreve, kom det inn ein epost frå Eid kommune der dei seier at dei gjerne vil bidra til at Eid kan få seg ein kommuneblome. Det er Stanislawa Voldsund som er vår kontaktperson, og så får vi sjå etter kvart korleis ho vil legge opp prosessen. Oddvin Vonheim frå fylkesstyret informerte oss om korleis dei har gjort det andre stader. Dei fleste har nedsett ein komite der ein har ein representant frå kommunen, ein politikar, ein frå det lokale hagelaget og evt. fleire. Desse kjem så fram til ei to-tre alternativ, som så blir oversendt ei fylkesdekkande nemnd med desse medlemene: fylkesordførar Nils R. Sandal, fylkesstyreleiar Olav Lunden frå KS og Fred Arild Grøneng frå fylkesavdelinga av Det norske hageselskap. Der blir den endelege avgjerda fatta.

På årsmøtet tirsdag 26.10., og tidlegare på Facebook-gruppa vår, kom det fram fleire uformelle forslag til blome:

Skogstorkenebb (Geranium sylvaticum)
Raud jonsokblom (Silene dioica)
Enghumleblom (Geum rivale)
Flikmelde (Atriplex hastata)

Dei som har synspunkt på kommuneblomen til Eid og gjerne vil kome med forslag, kan gjerne det. Skriv ein kommentar etter dette innlegget, skriv på Facebookgruppa vår (søk på Eid Hagelag), eller kontakt nokon av oss i styret på epost eller telefon.

Vi kjem tilbake med meir om dette seinare.

Biletet her er av ei Julerose (helleborus).

Sløvt av Formannskapet i Eid!

2010-10-20T09:37:00.006+02:00

Nyleg sendte vi i hagelaget epost til Eid kommune der vi ba om at dei tok oppatt saka dei fekk tilsendt for over eit år sidan: om val av KOMMUNEBLOME. Kommuneblomen skal vere identitetsskapande, ha ein relasjon til kommunen og vere eit positivt element i omdømet til kommunen heiter det.

Vi har enda ikkje fått svar på eposten, men saka har tydelegvis vore lagt fram for Formannskapet. Sist laurdag kunne vi lese følgande i Fjordabladet:

"Medan nabokommunane har valt sin kommuneblome, har engasjementet for å velje sin eigen blome vore tilnærma lik null i Eid. Eid hagelag har sendt brev til kommunen og tilbode seg å hjelpe til med dette, men i formannskapet vekte saka lite engasjement då brevet vart referert. Fungerande ordførar Kjell Magne Åshamar (Sp) fleipa med at sentralt plasserte Eid kanskje burde ha ein heil bukett, og det vart mumla om at høymole, som dei fleste har, kan vere ein aktuell blome."

Kva skal vi seie om dette? Eg er i alle fall ikkje imponert. Her i Eid har vi på nokre område forstått kor viktig det er med kultur (nokon som har hørt om opera i det siste?), men det gjeld tydelegvis ikkje all kultur. Eg ser også at naturvernforbundet forgjeves etterlyser respons frå kommunen når det gjeld vern av den truga Flikmelda ved Moengården.

Den 8. oktober kunne vi lese i Fjordenes Tidende at kommunestyret i Selje nå har landa på vill kaprifol (Lonicera periclymenum) som framlegg til deira kommuneblom. Dette blir endeleg avgjort av ein jury der både hageselskapet og Kommunenes sentralforbund er representerte. Der har dei tydelegvis greid det. All honnør til Selje for det.

Vi må sanneleg passe oss så vi ikkje blir sittande att med høymolen som einaste alternativ! (Å velje den snart utrydda flikmelda ville vel trass alt bli litt for flaut...)

Årsmøte tirsdag 26.okt.

2010-09-15T21:51:00.003+02:00

Tirsdag 26 oktober kl 20.00 blir det årsmøte i hagelaget.

Møtet vert i dei gamle apotekerlokala i rådhuset.

Sakliste:
1. Godkjenning av innkalling
2. Konstituering-val av ordstyrar, møtereferent og to til å skrive under på referatet.
3.Årsmelding
4.Rekneskap
5. Endring av vedtekter
6. Val
7.Innkomne saker

Dersom du har saker til årsmøtet, må dette være styret i hende innan 24. oktober. Send gjerne forslag til eidhagelag@yahoo.no

Spennande ting skjer i 2011

2010-09-14T23:47:00.006+02:00

I kveld har vi hatt styremøte i hagelaget og planlagt komande hagelagsår. Vi har mellom anna sett opp Peonmannen på lista, muligens i samarbeid med Vågsøy hagelag. Vi har også mykje anna spennande på planen, så følg med på bloggen for informasjon om kva, kvar og når!

Vågsøy hagelag på sopptur til Hornindal

2010-09-06T22:43:00.002+02:00

Eid hagelag hadde planar om sopptur i september. Desverre må denne gå ut.

Vi har motteke mail frå Vågsøy hagelag med invitasjon til å delta på sopptur i helga, så dersom du har interesse for sopp og vil være med, så ta kontakt med Vågsøy hagelag.

Under her klistrar eg inn mailen vi fekk:

Hallo igjen!

Minner om sopptur til Hornindal komande laurdag!

Påmelding seinast imorgon tysdag på grunn av innkjøp

Avreise frå Måløy kl 0930, Spiralen.

Vi skal plukke og lære om soppar ved Anne Bråten Seljeset, leiar i Nordfjord Sopp og Urtelag,

infoside:

http://www.soppognyttevekster.no

Sjå også:

http://www.honndalsportalen

Vi skal og bruke soppen i matrettar etterpå, så dagen kjem til å gå med.

Dette gler eg meg til!

Vi satsar på at fineveret held seg til helga, men ta uansett med kle til å vere ute i skogen i og gode sko.

Velkomen, og ta gjerne med ein ven!

Mvh

For Vågsøy Hagelag

Torunn Utnes

Fantastisk hagedag på Lote

2010-08-20T22:37:00.018+02:00

Torsdag 19. august fekk vi komme til Bjørg Wergeland og Emmanuel Sadorge ved vasskanten på Lote. Hagelaget har vitja denne hagen tidlegare, men mange har ytra ynske om å ta turen igjen. Veiret var nydelig - varmt og godt! Ein utruleg flott dag å gå på hagevandring.

På veg ned mot huset og hagen til møtte vi denne trivelige karen. Han sat liksom der i vindaugsposten og ynskte oss velkomne.

Gangstien ned mot hagen er av den retteleg romantiske sorten. Rekkverket langs stien var nytt sidan sist hagelaget vitja hagen. Rekkverket gjer nok god nytte på glatte vinterdagar, for stien ned er ganske bratt.
Utsikta frå hagen er fantastisk. Her har dei oversikt over alle som ferdast på fjorden. Det var virkelig ein fryd å sitje i hagen og nyte synet av fjord og fjell.

Dette gjestehuset er nytt sidan forrige gong hagelaget vitja hagen. Det får ein virkelig til å tenkje på varmare strok. Inspirasjonen er nok henta frå Frankrike, som er husbonden sitt heimland.

Flotte samplantingar i hagen. Her er det kanskje Acer artopurpureum og Acer shirasawanum som utfyller kvarandre.

Dei bratte skråningane var eit flott syn med ei fin blanding av blomstrande stauder og eviggrøne busker
Ikkje alle plantane er like prangane, men plassert på rett stad er dei likevel flotte blikkfang.

På grunn av at tomta er så bratt, må det lagast trapper og stiar av stein over alt. Innimellom alle desse steinane som er murt opp finn ein ulike stauder som trivast i dette miljøet.

Brua har Emmanuel mura. På grunn av det tørre veiret siste tida, var vassføringa noko beskjeden, men brua er no like fin anten vassføringa er stor eller liten. På andre sida av "vassdraget" fann vi kjøkkenhagen.

Dei fleste kjenner den rosa eller blå hagehortensiaen (Hydrangea macrophylla), men Bjørg hadde ein flott lilla variant ved grillplassen sin. Den gjorde seg godt saman med kuletistel (Echinops bannaticus)Denne kattosten hadde ein nydelig rosa farge, og viste godt igjen i skråninga der den stod

På veg gjennom skogen ned mot fjorden var det sjølvsagt lagt stein å trakke på.

Vi var omlag 25 deltakarar på denne hagevandringa. Det er meg stor glede styret merkjer seg at det stadig kjem nye deltakarar på vandringane våre, så det er ekstra kjekt kvar gong vi ser nye andlet i gjengen :)

Vi takkar vertskapet for ein kjempetrivelig kveld!

19. august: Hagevandring hjå Wergeland og Sadorge på Lote

2010-08-11T21:44:00.007+02:00

Hagen til Bjørg Wergeland og Emmanuel Sadorge på Lote er ein flott hage, som mange har hatt gleda av å vitje tidlegare. Eid hagelag var på besøk for nokre år sidan, og fleire har hatt ynskje om at hagelaget skal ta turen igjen.

Brua på biletet er berre eit av steinprosjekta som Emmanuel har mura i hagen.

Hageprogrammet Grønn Glede vitja hagen i 2009, og om du klikkar på linken, kan du sjå innslaget igjen.

Den 19. august tek vi turen tilbake til hagen på Lote. Møt opp på busstasjonen på Nordfjordeid kl 18.00, så køyrer vi i lag.

Det vert lotteri, ein kaffitår og noko å bite i.

Eit Fuchsia-eventyr!

2010-08-09T22:30:00.008+02:00

Forrige torsdag arrangerte Eid hagelag besøk hos Magne Dalseth på Haugane i Eid for å sjå på den store Fuchsiasamlinga hans. Vi var ein liten gjeng som stilte opp, og vi fekk ei flott oppleving denne fine seinsommarettermiddagen. Under ser du Magne sjølv, i ferd med å fortelje om sin første Fuchsia, som var ein stikling han fekk frå mor si og som han har enda - 40 år seinare. Nå er den som eit lite tre. Dette vart ei skjebnesvanger gave, for den starta noko ein kanskje kan kalle besettelse, og som førte til at han i dag har nærare 200 ulike sortar av denne spesielle planta som heiter Fuchsia, eller Tåre eller Kristi Blodsdråpe som den også har blitt kalla. Hadde det ikkje vore for den spesielle vinteren i år hadde han hatt fleire, for dessverre mista han mange plantar i vinter.
Vi fekk også kome inn i drivhuset, og her beundrar vi eit oppstamma eksemplar av den same planta som han fekk av mora 40 år tidlegare. Han har teke mange stiklingar av denne planta, og noko av det som gjer at folk blir hekta på Fuchsia er truleg nettopp at den er så lett å stiklingsformeire.
Av Fuchsia finst det mange tusen navnesortar etter kvart, og kvart år blir det lansert fleire. Det jobbar ivrige gartnarar verda over for å krysse fram stadig nye og spennande sortar. Den du ser under her heiter "Fire and ice", altså "Eld og is".

Nokre har laaange blomster, og den du ser under er eit eksempel på dei. Navnet hugsar eg dessverre ikkje, men det kan du sikkert få om du spør Magne;-)

Her ser du eit eksempel på Fuchsia med ørsmå blomster. Du finn dei i alle storleikar og fasongar, men ein får nok ein mistanke om at dei som lagar nye sortar kanskje har vore opptekne av å få fram store blomster ei stund....

I drivhuset sitt har Magne også eit eksemplar av ein villart: Fuchsia procumbens, ein Fuchsia som kjem frå jungelen og altså er ei plante rett frå naturen. Den lagar store tepper, og har bittesmå blomar som peikar rett opp. Den er faktisk frøekte, og det tyder at du kan så frø av den og få akkurat same planta. Dei foredla Fuchsiaene er dessverre ikkje frøekte, sjølv om dei ofte dannar ein slags svarte bær - som faktisk er etande!

Dersom du har lyst til å ta vare på Fuchsiaene dine i vinter skal du i følge Magne klippe dei ned, ribbe dei for blad, og riste av dei jorda på røttene. Så skal du klippe av dei lyse rottrådane. Dette vil føre til at planta går i dvale. Om du så oppbevarer dei kjøleg men frostfritt i fuktig torv, og kanskje gir dei ein bitteliten skvett vatn nokre få gonger, så skal den skyte friske skot til våren når den blir planta i jord og vatna forsiktig. Da må den ha lys, men når den er i dvale treng den ikkje det.

Start plantane dine tidleg for å få blomstring om sommaren, dei treng nokre veker på å danne knuppar. Dei fleste Fuchsia likar skugge til halvskugge, og kjøleg, vått vestlandsvær trivst dei heldigvis med. Men, det finst også Fuchsia som tåler og likar sol, så dette er ei allsidig plante. Ein ting til: gje den gjødsel jevnleg for flott blomstring. Som Magne seier: alle treng mat for å klare å gjere jobben. Det gjeld også alle slags plantar. Sjølv om Magne brukar Superba i alt vatningsvatn, vil eg seie at det viktigaste er AT du gjødslar - kva du gjødslar med er trass alt ikkje så viktig. Lykke til!

Fuchsiablomstring hjå Magne Dalseth

2010-07-21T18:21:00.004+02:00

Eid hagelag har tidlegare besøkt Magne Dalseth. Han har ei fantastisk samling av fuchsia som verkeleg er verdt å sjå. Forrige gong hagelaget var der, var det litt tidleg i sesongen, så det vart ytra ynskje om nytt besøk i høgsesongen for blomstring.

5. august tek vi igjen turen til Magne Dalseth på Hauane. Vi møtast på busstasjonen klokka 18.00 og køyrer i lag.

Som vanleg blir det loddsalg, ei liten kaffikopp og noko å bite i.

Årets peonblomstring

2010-07-18T22:33:00.007+02:00

I år har peonane hatt ei lang blomstringstid på grunn av det kjølege været. Aldri så gale at det ikkje er godt for noko! Eg har teke nokre bilder av ei samling store og flotte peonar i ein hage i nærleiken. Det er visstnok fleire av desse som er importert frå USA. Nå må det seiast at peonar er flotte uansett, om det er vanlege bondepeonar eller meir spesielle sortar. Likevel var desse eit syn, berre sjå her:

2010-06-30T00:04:00.002+02:00

Hagelaget har fått ein ivitasjon frå hagelaget i Stryn. Dei skal besøkje Flor og Fjære og
Baroniet i Rosendal , og dei har ledige plassar om nokon kjenner seg freista.

Stryn Hagelag arrangerer tur til Flor og Fjære fredag 20-søndag 22. august. Vi har framleis plasser ledig,

no går vi ut til våre "naboer" for å sjå om nokon kan ha interresse av å vere med. Det blir 2 overnattinger på hotell.

tilbaketuren går forbi Rosendal, så vi får med oss rosehagen i Baroniet, pris pr.p. i dbl.rom ca.3500, kanskje litt mindre avheng litt av antall(ferge/bomavg) Om vi får med nokre frå dokke, kan vi sikkert køyre om Eid.

Kontakt meg innan 1.juli på 57871336/90869077 el.e-post synna@beinnes.no

Tur til urtegarden "HØGT OG VILT" i Devik, Gloppen

2010-06-28T22:04:00.010+02:00

Den 10. juni arrangerte Eid Hagelag tur til urtegarden til Bjørg Devik Aurlien i Devik i Gloppen. Vi var seks personar som deltok, og som fekk ei flott oppleving denne kvelden. På biletet over ser du Bjørg i ferd med å fortelje oss litt om urteproduksjonen sin. Etterpå fekk vi smake på to gode urtetear, før vi tok ein tur nedanfor husa der ho har beda med ulike slags velduftande og spennande vekster.

Ein ting kan seiast om Devik, og det er at det er rimeleg bratt der! Du verda for ein utsikt, og du verda for eit krevande landskap å dyrke noko som helst i. Bjørg fortalde at ho har vakse opp på ein av nabogardane, og vi kan nesten tenke oss at det må vere ein avgjerande faktor når ein velger bustad, og urteproduksjon som leveveg, på ein slik stad.

Til slutt fekk vi kome inn på utsalet i det gamle stabburet, og der hadde vi det obligatoriske loddsalet, samt kaffe og nydeleg rabarbrapai.
Bjørg sel svært mange slags tørka urter og tear, av beste kvalitet trur eg vi kan seie etter å ha fått kikke på både urtetørker og nybygd produksjonsrom i låven. Her er det ikkje noko som går på slump, og produkta til Bjørg er utruleg delikate og freistande. Ho kunne mellom mykje anna tilby eit eige brødkrydder, fiskekrydder og pizzakrydder, urtesalt og tørka kronblad av både ringblomst, kornblomst og hestemynte til mellom anna kakepynt. Lekkert, og utan eit einaste E-stoff.....

Vi fekk vite at ho mellom anna leverer til Gloppen hotell som satsar på lokalt produsert mat, og som har fått mykje ros for den velsmakande maten sin. Vi vil takke Bjørg for at vi fekk kome, og anbefalar alle å ta seg ein tur hit i sommar.

Tur til Høgt og Vilt i Devik, Torsdag 10. juni

2010-06-04T22:55:00.005+02:00

Torsdag 10. juni tek vi turen til Høgt og Vilt i Devik, Gloppen.

Temaet for dagen er sjølvsagt urter, og vi får omvisning på urtegarden til Bjørg Devik Aurlien.

Det vert som vanleg kaffi, noko å bite i og lotteri.

Møt ved busstasjonen på Nordfjordeid kl 17.10.
Ferja går kl 17.30.
Vi samlar oss i færrast mogeleg bilar og køyrer i lag.

Vi tek kr 50,- i betaling. Dette for å dekke utgifter for dei som køyrer.

Flott hagelagstur til Ulsteinvik 29.05.10

2010-05-30T11:42:00.008+02:00

Mariann Stranden åpna hagen sin for Eid hagelag. Ho har laga ein skikkelig trivelig hage rundt huset som ho leiger. Drømmen er eit lite småbruk der ho skal kunne utfalde seg fritt. Om sjangsen skulle by seg, grev ho opp dei opp og tek dei med seg til neste plass.

Dei fleste små sprekker og krokar kan nyttast til planting. Takløken er ikkje så kravstor, så den greier seg heilt fint i ein slik stubbe.

Grønnsakhagen har fått fin plass i pallekarmar. Ein enkel og fin måte å halde orden i sakene på.

Cortusa Matthiola, ein flott plante i nøkleblomfamilien. Denne har Mariann sådd sjølv.

Denne søte her heiter truleg Primula Saxatilis.

Eit rompeakebrett fullt av takløk som er til overs vart også eit dekorativt innslag.

Desse flotte kassene inneheld små fjellhagar.

Det var ein god gjeng som vart med på hagelagsturen denne dagen. Veiret var flott, men litt vind måtte vi tåle. Heldigvis har dei fleste vore på hagevandring før, slik at ein veit at ein må kle seg godt.

Dei har nok ikkje vore så pene desse skoa, men etter at Mariann har fått styre litt med dei, har dei virkelig fått sin eigen sjarm.

Så kom vi til Terje Haddal sin hage. I tillegg til hagen hass, fekk vi ta turen ned i hagen til mor hass etterpå. Her viser han oss stolt fram inngangspartiet sitt.

Primulaer , og tofarga perleblomster. Han hadde massevis av primula og auriklar i hagen sin.

Denne trappa er dekka av noko som vart kalla vokspute. Litt av eit syn!

Frittilaria meleagris, eller rutelilje som vi gjerne kallar den.

Fabelaktig utsikt frå hagen!

Også Terje Haddal nytta kvar ein ledig krok til sine plantar

Hagelagstur til Ulsteinvik Laurdag 29. mai

2010-05-20T19:52:00.004+02:00

Då har vi ein plan for hagelagsturen til Ulsteinvik.
Vi møter på busstasjonen på Nordfjordeid kl 09.00. Vi fyller bilane og køyrer i lag. Ferja frå Folkestad går kl 09.45.

Mellom Volda og Ørsta ligg eit hagesenter, som vi tenkte å stikke innom før vi køyrer vidare til Ulsteinvik.

I Ulsteinvik vil vi besøkje hagane til Mariann Stranden, Oddbjørg Haddal og Terje Haddal.

Det blir mykje på ein dag, så det er ikkje sikkert det blir så god tid til evt kafebesøk, så difor ynskjer vi at alle tek med seg niste.
Kaffi og ein liten kakebit attåt kaffien serverer vi sjølvsagt som vanleg :)

Pris kr 50,- for hagevandringa, og så må ein dele på ferjeutgiftene.
Køyringa vil sjåføren få dekka av hagelaget.

Vi håpar mange vil være med oss på tur denne laurdagen!

Planting på Sørgande mor

2010-05-08T21:35:00.004+02:00

Som ein av få kommunar i landet, held eidarane på tradisjonen med å markere frigjeringsdagen på Nordfjordeid. I år er det 65 år sidan firgjeringa av Noreg etter 2. verdskrigen. I sentrum for markeringa står Sørgende Mor, minnesmerket over dei falne i 2. verdskrigen frå Nordfjord. Det er Eid kommune og Plassens Venner som står føre markeringa.

Kvart år har medlemmer av hagelaget pynta og planta ved Sørgande mor før 8.mai. I år var det leiar Herdis Bergset som tok på seg å gjere dette, og resultatet vart no retteleg pent.

Sjå kor fint dei kvite fiolane lyser opp i skuggen under det flotte monumentet!

Vågsøy hagelag på tur til Spjelkavik

2010-05-03T09:27:00.002+02:00

Vi har fått invitasjon frå Vågsøy hagelag:

Minner om Vågsøy Hagelag sin tur til Ole Jonny Larsen sin hage i Spjelkavik søndag 9. mai!

Påmelding til Eva Hagen, 94344314, innan onsdag 5. mai.
Avreise frå Spiralen i Måløy kl 9.30 i privatbilar, kl 10 frå Bryggja – Statoil - i buss.

Ta med mat og drikke, og gjerne ein ven

Vil du være venn med oss?

2010-04-25T11:43:00.002+02:00

Eid hagelag har no fått eiga gruppe på Facebook. Dette blir nok eit litt friare forum enn bloggen, der ein kan prate litt meir fritt rundt hagegleder og hagesorger enn det bloggen tillet. Kom å bli med i gruppa vår. Du finn oss ved å søke på 'Eid hagelag' på Facebook. Gruppa er åpen for alle, så du treng ikkje være medlem i hagelaget for å være med.

Tillitsvalgtsmøte på Gloppen hotell

2010-04-25T11:25:00.004+02:00

Søndag 24.april hadde Hageselskapet i Sogn og fjordane tillitsvalgtsmøte på Gloppen hotell på Sandane. Herdis, Elin og Merethe møtte frå Eid hagelag.
Programmet først på dagen var lagt opp litt fritt med presentasjonsrunde og eit par timar laust prat om hagelaga sitt arbeid og utfordringar. Ei nyttig praterunde som gav oss som kom frå Eid mange tankar om arbeidet vidare med hagelagsarbeidet vårt.

Gloppen hotell har dei siste åra jobba bevisst med å utvikle den lokale, kortreiste maten. Lunchen vi fekk servert var utsøkt! Sjå på bileta og misunn oss det gode måltidet ;)

Etter lunchen var det leiaren i Hageselskapet Sogn og fjordane, Jostein Kjøsnes som stod for pratinga. Han Fortalte oss om Vassendenprosjektet. Mange av oss som har køyrt gjennom Vassenden i Jølster dei siste åra har lagt merke til den fantastiske utviklinga bygda har hatt. Jostein Kjøsnes har vore primus motor for dette prosjektet, og han heldt eit inspirerande foredrag om dette prosjektet, og om korleis ein kan klare å få til det nesten umulige, dersom ein virkelig vil.

Trivelig fotokurs.

2010-04-19T13:29:00.002+02:00

Det var berre fem deltakarar på fotokurset. Ein liten, men ivrig gjeng. Tim Øsleby og Øystein Torheim var kurshaldarar. Mesteparten av tida fekk vi sjå bilete som vi diskuterte i fellesskap, slik at vi kunne lære litt om korleis vi bør tenkje når vi skal ta eit bilete.

Vi fekk så mange gode tips at det blir for mykje å gjenta her, men nokre heilt enkle tips kan hjelpe deg til å ta betre bilete:

-Tenk over kva som skal være i fokus på biletet.
-Sjå etter ting som uroar motivet ( t.d. plantelappar, flasker, blomsterpotter osv.) og rydd det vekk.
-Gå så nært motivet som mogeleg.
Dersom det er noko som uroar i bakgrunnen, så er det betre å ha med så mykje at du ser kva det faktisk er enn at ein berre ser ein liten flik av det. Det gjev betre djupne i biletet.
Motivet bør "sjå inn" i biletet. Td. om du tek bilete av ein blomst frå sida, bør fronten på blomen vende mot midten av biletet.
Ta mange bilder. Vær ivrig med å slette dårlege bilete,slik at du berre sit igjen med dei beste bileta.

Det vart eit skikkelig trivelig kurs, og det er godt mogeleg at det kjem eit nytt kurs utover sommaren/hausten.

Hypertufa i esker og bøtter

2010-04-11T10:33:00.013+02:00

Laurdag gjekk kurset i støyping av hypertufa av stabelen. Vi var skikkelig heldige med veiret. Sola skein heile tida medan kurset pågjekk, så vi fekk oss ein fantastisk dag i lag.
Gro Haga var kurshaldar. Ho er fylkessekretær i Hageselskapet, så det er sikkert mange som kjenner til henne frå før. Ho kjende til hypertufa gjennom ein studiering som hennar lokale hagelag hadde om temaet.

Deltakarane hadde vore flittige til å samle kasser til å støype i. Vi brukte for det meste pappkasser, men det finst utallige måtar å gjere dette på. Det er kun fantasien som set grenser for kva du kan bruke til å støype i.

Her har alle deltakarane laga kvar si form til å støype i. Vi har ei ytterkasse som då blir yttermåla på karet, og ei innerkasse som dannar innvendige mål på karet.
Vi brukte sand, sement og ugjødsla torv i vår blanding. Dersom ein gjer eit søk på hypertufa på internett, vil ein finne at der er mange ulike blandingar ein kan bruke. Antageligvis vil ein få ulik utsjånad på kassene, ut frå kva blanding ein nyttar.

Det er ikkje alle som fører ugjødsla torv i sortimanget sitt, men vi fekk tak i på Torheim Gartneri. Sekkane i bakgrunnen er torvsekkar, og vi brukte mindre enn ein sekk til alle kassene vi laga. Vi delte opp torva i ei trillebår og fukta den lett før vi begynte å blande. Dette for å unngå store klumpar i blandinga.

Før vi starta å blande betongen måtte vi ha oss ei matøkt. På menyen i dag var det pastasalat og sukksessterte, med ein kaffitår attepå. Kanskje ein smule kjølig å sitje i ro sjølv om sola skein, men det gjorde likevel godt med ein matpause.
Her er Linda i full gang med blandinga. Vi brukte 3 deler sand, ein del sement, ein del torv og vatn etter behov. Konsistensen skulle være som ein litt godt tjukk risengrynsgraut, i følge kurshaldaren.
Fleire hjelper til med å få den rette blandinga.

Her er kassene i ferd med å bli fylt med sement. Ein fyller først i botnen ca 4 cm tjukt lag, og set trepropper i for å lage dreneringshol. Så set ein ei kasse oppi og fyller rundt denne for å lage kantane på karet. Det viste seg at dei største kassene hadde ein tendens til å gje litt etter, slik at ein sikkert får litt bulande kantar på karet. Derfor har nokre kantar fått eit tau rundt seg for å holde litt på fasongen.
Eit ferdig støypt prosjekt. No må det stå nokre dagar å herde. Ein kan gjerne ta av pappeska ein dag eller to etter, og forme utsida med ein spade eller liknande. Kassa er ikkje ferdig herda enno, og tillet difor at ein "høvlar" litt på kantane. På den måten kan ein til dømes risse inn motiv, og høvle av hjørna om ein ynskjer ei litt meir avrunda form.

Desse kassene vil få ein fin patina etter kvart som tida går, men i starten vil dei nok sjå ut som eit nokså vanleg betongkar.
Ein fornøygd kursdeltakar tek seg ein pust i bakken etter endt støyping.

Det var ikkje noko hokus-pokus å lage desse kara. Dette kan kven som helst lage heime i eigen hage. Ein treng ikkje betongblandar, det går heilt fint å blande i bøtte eller trillebår.

Det vil komme fleire bilete etter kvart som kassene herdar og forskalinga vert teken av. Kanskje vi i løpet av sommaren/hausten kan få lokka ut av deltakarane bilete av kara med plantar i?

Her er eit av traua ferdig behandla og planta. Når pappkassene vart fjærna hadde trauet eit kjedelig betongpreg. Trauet vart pussa med ei metallbørste for å få avrunda, og er allereie penare å sjå på. Etter kvart som veir og vind får jobbe med trauet, vil det få eit meir rustikt preg.

Fotokurs 15. april

2010-03-10T14:23:00.005+01:00

Fleire gonger har medlemer ytra ønske om å lære seg meir om fotografering i hagen. Vi har vore så heldige å få Tim Øsleby til å halde eit kveldskurs for oss.

Datoen er sett til 15. april kl 19.00. Det er sett av ca 3 timar til kurset. Kurset vert i Lars Lunde (Fotodoktoren) sine lokale i Nordfjordeid sentrum.

Pris for kurset: Medlemmer 150,- og ikkjemedlemmer 200,-

Kurset vil kunne ta for seg det mest grunnleggjande for digital fotografering på generelt plan. Dvs korleis få bilder inn på pc, korleis holde orden på bileta, og korleis bruke dei. Korleis kvart enkelt kamera virkar blir for mykje å gå inn på på ein kveld, så her bør deltakarane lese eigen brukarrettleiing for kameraet.

Det blir råd om korleis ta betre bilete, generelt og blomsterbilete generelt. Stikkord: Tenke lys og bakgrunn, kva ein tek med i biletet osv.

Dersom det er interesse for det, kan det bli aktuelt med eit oppfølgingskurs til hausten.

Er du intressert, send mail til eidhagelag@yahoo.no eller på telefon til Herdis 95056239

Kurs i hypertufa 10. april

2010-03-03T20:20:00.007+01:00

Laurdag 10.april kl 11.00 held Eid hagelag kurs i støyping av hypertufa.
Kurset finn stad på Langeland på Nordfjordeid, og det vil vare i ca 4-5 timar.

Prisen på kurset vert kr 900,-. Dette inkluderer det meste av materialer og eit lite måltid .
Påmelding til Elin på tlf 99161392 eller mail eidhagelag@yahoo.no

Det er Gro Haga frå Viksdalen som er kurshaldar. Gro har i mange år vore tilsett som sekretær i Hageselskapet.

Plantetrau i hypertufa er små og store trau støypt av sand, sement og torv. Traua har eit røft og ubehandla uttrykk og vert ofte nytta til å lage små fjellhagesamfunn.

Foredrag med Eli Kjær i Hornindal

2010-03-03T20:04:00.004+01:00

Leiaren i Eid hagelag har fått telefon frå Hornindal hagelag om at Eli Kjær skal være på Raftevolds hotell torsdag førstkomane kl. 19. Ho skal snakke om "Kjende og ukjende busker og tre til heilårshagen".

Medlemmene i Eid hagelag er hjarteleg velkomne.

Eli Kjær er landskapsarkitekt og har drive med prosjektering av grøntanlegg i private hagar og gardstun. Ho har vore aktiv i Hagelselskapet i ulike verv lokalt og sentralt, og har halde mange foredrag og kurs. Ho er oppteken av plantebruk og komposisjon og har prøvd ut mykje nytt i eigen hage.

Frømøte på Stokkenes gjestegard

2010-02-10T20:47:00.008+01:00

Det vart ein trivelig frøkveld på Stokkenes gjestegard for dei 10 som deltok. Ein liten snøstorm og kulde hindra oss ikkje i å tenkje på planlegginga av årets hagesesong. Varm kaffe og noko godt å bite i attåt gjev alltid litt ekstra god stemning rundt bordet.

Dagens program var såing, mest om sommarblomster, men også litt om stauder. Det var sekretæren som fekk i oppdrag å stå for det "faglege".

Biletet over viser utstyr som kan nyttast for å så. Mange trur ein må ha dyrt og flott utstyr for å setje i gang med såing, men her kan ein komme langt med forholdsvis lite.

Det er ikkje nødvendig å kjøpe såjord, ein kan godt bruke vanleg jord. Såjorda inneheld mindre gjødsel og meir sand enn vanleg jord. Den er også finare, slik at det kan være lettare å prikle småplantar som er sådd i denne jorda enn i vanleg plantejord. Mange likar å så i torvbrikettar, men då bør ein ikkje så meir enn eitt eller to frø i kvar brikett.

På dei fleste frøpakkane står det kva behandling frøa likar på baksida. Nokre frø er lysspirande, og dei må ikkje dekkast med jord når ein sår, medan andre må ligge nedi jorda for å spire. Såtabellen som vart delt ut på møtet er eit godt hjelpemiddel. Der finst opplysningar om såtid, kor lang tid det tek før planten blomstrar og når den blomstrar. For dei som ikkje var på møtet, kan tabellen printast ut frå Hagegal. Her kan ein også finne mykje spennande informasjon om formeiring av plantar, og ellers alt som har med blomster og hageliv å gjere.

Merking av pottene er svært viktig. Ein kan skrive direkte på pottene, eller bruke pinnar som kan puttast nedi såpotta. Når spirane kjem opp av jorda er det ikkje alltid like enkelt å vite kva som er i pottene dersom ein har slurva med merkinga.

Desse merkepinnane er laga av ei gammal persienne som er klipt opp i passande bitar. Dette fungerer godt, men vær obs på at det kan bli ganske skarpe klippekantar på dei. Ellers kan ein få kjøpt merkepinnar i mange ulike utformingar. Hugs berre å nytte ein vassfast tusj eller blyant når du skriv, slik at ikkje merkinga forsvinn

Når frøa er i jorda skal dei setjast lunt med plastdekke over. Eit lite minidrivhus som dette kan være fint, men plast duger like fint. Hugs berre på at det må komme frisk luft til jorda og frøa iblant, slik at det ikkje byrjar å mygle under plasten. Når frøa spirar, vil dei gjerne ha det litt kjøligare, så då må dei flyttast.

Dersom du har begrensa lysforhold er det viktig å ikkje starte såinga for tidleg. Forholdet mellom temperatur og lys etter at frøa har spirt er viktig for å få eit bra resultat med småplantane sine. Dersom det blir for varmt i forhold til lysmengda, vil ein få lange, tynne spirer. Derfor kan det være greit å prøve å halde temperaturen etter spiring på 12-15 grader. Dersom ein ikkje har plantelys, kan ein setje småplantane under vanlege lysstoffrør.

Det viktigaste av alt: Kos deg med såinga di! Gled deg over dei spirane som etter kvart dukkar opp i pottene dine. Det er ingen katastrofe om ikkje alle spirane veks opp, det gjer dei heller ikkje ute i naturen.

Frømøte på Stokkenes gjestegard torsdag 4. februar

2010-02-01T22:32:00.005+01:00

No har det vore rimelig kaldt og vinterlig ei god stund, men vi er på veg mot lysare og varmare tider. Mange av oss kriblar i fingrane etter å komme i gang med årets hagesesong. Det er derfor ikkje unaturleg å starte hagelagssesongen med eit frømøte.

Medlemmer i hagelaget vil prate litt om såing av sommarblomster og stauder. Det vert eit enkelt og uhøgtileg arrangement der ein kan spørje kvarandre til råds og gjerne komme med eigne erfaringar. Dei som ynskjer det kan ta med seg frø og bytte. På denne måten kan det hende ein får prøve sortar ein ellers ikkje hadde kome til å så sjølv, så dette kan bli spennande!

Som vanleg byr vi på noko å bite i og ein kaffitår eller to. Det vert lotteri med premiar som speglar temaet for dagen.

Vi ynskjer både medlemmer og ikkje medlemmer velkomne.

Vel møtt!

Julemøte på Stokkenes gjestegard

2009-11-18T23:07:00.004+01:00

Tirsdag 24.november kl 19.30 vert det julemøte på Stokkenes gjestegard.

I år vil vi vise lysbilete frå hagelaget sine aktivitetar i året som har vore. Dette blir ein fin anledning til å sjå også frå dei hagevandringane du ikkje hadde mogelegheit til å delta på i året som gjekk.

Vi satsar på ein trivelig mimrekveld med gløgg og julemat og lotteri med fine premiar.

Håpar mange finn vegen til Stokkenes denne kvelden!

Årsmøte

2009-10-16T10:14:00.002+02:00

Årets årsmøte vert 22.oktober kl 20.00 i lokala til frivilligsentralen.

Sakliste:

1. Godkjenning av innkalling.

2. Konstituering

- val av ordstyrar

- val av møtereferent

- val av to til å skrive under møtereferatet

3. Årsmelding

4. Rekneskap

5. Endring av vedtekter?

6. Innkomne saker

7. Val

8. Handlingsplan

Sopptur laurdag 12. september

2009-09-07T21:32:00.015+02:00

Laurdag 12. september satsar vi på å få til den planlagde soppturen for i år. Opplegget for dagen er at vi tek ein liten skogstur først. Dei som vil plukke sopp kan gjere det, og dei som heller vil plukke bær eller materiale til juledekorasjonar etc. kan gjere det. Dei som berre vil nyte naturen og hyggeleg fellesskap får gjere det også.

Etterpå samlast vi i hytta nede på Vaskeplassen ved Eidselva/Hærmuseet, der vi har fyr på peisen, og utlodning, kaffe og kaker som vi brukar. Då er vi rimeleg uavhengige av været, men det er likevel lurt å kle seg godt.

Vi har ikkje med oss dei store soppekspertane, men nokre av oss kjenner og plukkar tre-fire sikre soppar, og kan gå god for tryggleiken om vi held oss til desse. Vi har også med soppbøker til utlån. Ta med papirposar eller korg til å plukke i, og gjerne ein liten, spiss kniv. Det er nok lurt å ha støvlar eller anna vasstett fottøy.

OBS!!! Ta på deg refleksvest! Hjortejakta har byrja, og da er det greit at vi er godt synlege:-)

Møt opp bak busstasjonen på Nordfjordeid kl 12.00

Hagevandring på Bryggja

2009-08-28T19:18:00.008+02:00

Onsdag var hagelaget på besøk hjå Eva Hagen på Bryggja. Veiret, som elles har vore så som så i det siste, var aldeles praktfullt denne dagen. Vi var 14 stk som tok turen denne dagen, og vi vart hjarteleg tekne i mot av Eva.

Det var ein fryd å labbe rundt og kikke i hagen til Eva. Hagen ligg lunt til og inneheldt mykje som var verdt å sjå. Til dømes hagedammen på biletet under. Det var frodig og flott rundt dammen.

Den romantiske blå brua gjorde det lett å studere livet i dammen. Det som fanga vår merksemd denne dagen var denne fantastiske, raude vannlilja.

På ei lita høgde i hagen låg eit skjønt, lite lysthus. Her ser vi Eva fortelje oss om hagen sin framfor skråninga opp mot lysthuset.

Over ser du Eva sine to faste hagevener....

Utepeisen til Eva gjorde stort inntrykk på alle. Ho hadde fyrt opp før vi kom, så det var deilig å setje seg ved peisen etter vandringa og høyre på knitringa frå elden. Rundt peisen hadde ho oppmurte benkar, der vi sat og kosa oss med kaffi og ein kakebit, og praten gjekk om laust og fast.

Sukkulentane hadde fått seg ein flott plass på peishylla

Utsikt frå hagen mot Hornelen.

Hagevandring på Bryggja 26. august

2009-08-18T22:33:00.004+02:00

Sommarferien er over, og det er på tide å komme i gong med aktivitetane for hausten. Vi startar med hagevandring 26. august. Då er det hagen til Eva Hagen på bryggja som er målet vårt.

Eva har ein spanande hage, som er skapt utav ein fjellknaus, der dei har skote ut og laga til hagen. Ho har ein del murar, utepeis og lysthus. I tillegg til dette har ho ein hagedam som fekk pris frå Hagen for alle i 1998.

Vi har som vanleg med oss kaffi/te og noko å bite i. Lotteri vert det også.

Oppmøte bak busstasjonen på Nordfjordeid kl 18.00.

Det kostar kr 50 for å dekke køyringa.

Opplevingssøndag på Hovden 23. august

2009-08-15T12:08:00.005+02:00

Hagelaget har fått mail frå Hageselskapet Flora. Denne inneheldt ein spanande ivitasjon til opplevingssøndag på Hovden. Det vert ikkje organisert noko frå Eid hagelag si side, men dersom du er intressert, finn du telefonnummer for påmelding nederst på sida.

Hovden inviterer til opplevingssøndag 23. august.
Fire foreiningar, Hagelaget, Turlaget, Seglforeininga og Hovden/Barekstad grendalag inviterer til opplevingar på Hovden sundag 23.aug. Det vert avreise med oppsett skyssbåt frå Fugleskjærskaia kl. 09.30 til Kjetangen der Berit Steen og Kjartan Godø tek i mot i kunstnarleg hage mot havgapet; så spennande og spesiell at Grønn Glede har gjort opptak der i år til eit program som står på sendeplanen i 2010. Der kan ein også kjøpe kaffi og noko å bite i dersom veret tillet eit utandørsmåltid.
For dei som ynskjer, det går turen så via Domba til Kvanhovden fyr med vegvisar. Der held Tone Ulriksen Standal ope fyr med kaffi og vaflar.
Etter ein stopp der går fylgjet til Hovdevåg der ein enten kan gå over høgdene til Barekstad eller få skyss dit i privatbilar for ein tiar.
Det andre alternativet er ein fin spasertur på vegen frå Kjetangen innover mot Barekstad der ein undervegs stoppar i ein annan fin hage hos Anne Greta Godø.
I Barekstad held grendahuset ope frå kl. 12.30 med sal av suppe og kaffi med sveler og vaflar.
Om ein i tillegg vil nyte ein fin og overkommeleg tur i terrenget, tilrår vi turen opp til Vemannsrøysa frå Barekstad.
Returen til Flora går med rutebåt kl. 16.00, og for dei som ynskjer det, kan Seglforeininga også segle deltakarar attende til Florø.
Hovden er den nordlegaste og største øya i kommunen vår med fjell, vatn og flatt lende langs strandflata, svaberg, vikar og vågar med spennande geologi, flora og fauna. Øya er som skapt for naturopplevingar, og med om lag 50 fastbuande i dei små bygdene, er dette framleis eit levande kystsamfunn på dørhella til Nordsjøen som gjerne tek i mot besøk. Turen er open for alle og kostar kr. 120 per pers. I tillegg kjem returbillett med rutebåt eller seglbåt.

Bindande påmelding til Sissel Strømmen tlf.90180067 eller
Fred-Arild Grøneng tlf. 99166451 snarast, men innan fredag 21.aug kl.20.00

Lokalstoff i Grønn Glede

2009-07-27T09:20:00.004+02:00

Tysdag 28.juli viser NRK hageprogrammet Grønn glede. Denne gongen besøkjer dei ein hage på Lote, som fleire av hagelaget sine medlemmer kjenner frå fleire tidlegare hagevandringar.
Fyll kaffikoppen, sett deg godt til rette i sofakroken og kos deg med glimt frå hagen til Emanuel og Bjørg.
Her er ein link til NRK si omtale av programmet

Pærebrann-aksjonen i Eid

2009-06-26T20:59:00.005+02:00

Her ser du bilete av eit blad av Bulkemispel-planta, som er ei av dei to hageplantane/hekkplantane som skal utryddast i denne aksjonen. Det nederste biletet syner bulkemsipelen sine bær, slik dei ser ut nå i slutten av juni. Det seier seg sjølv at ei plante som set så rikelege mengder med bær, har frødd seg i naturen her i Eid kommune. Ver gjerne på utkikk etter slike plantar i naturen også, da dei også bør fjernast.

Kvifor er det så viktig å fjerne desse vekstene? Mange har stor nytte av både bulkemispel og pilemispel som hekk og skjerming i hagane sine, og det medfører difor ulempe å ta dei vekk.

Saka er at desse vekstene er vertsplantar for fruktsjukdommen pærebrann, som angrip både pære og eple.

Mandag 15. juni var den offisielle datoen for starten av pærebrann-aksjonen i Eid kommune. Dette er ein nasjonal aksjon, og er eit samarbeid mellom Næringsmiddeltilsynet og Norsk Hageselskap som Eid hagelag tilhøyrer, og fleire andre. Dette vart omtala i Fjordabladet.

Her finn du meir informasjon om pærebrann. Under finn du ein uttale som mattilsynet har publisert. Her er mellom anna nokre konkrete tips og råd om korleis du bør gå fram om du skulle ha bruk for å utrydde desse vekstene, og informasjon om kven som er kontaktperson i Eid kommune dersom du skulle ha bruk for å spørje nokon til råds, få hjelp til fjerning eller andre ting.

Mattilsynet sin uttale:

"Ryddeaksjon mot etablering av pærebrann i Nordfjord
Bakgrunn for aksjonen
Den alvorlege plantesjukdomen pærebrann spreier seg på Vestlandet. På verdensbasis er pærebrann ein av dei mest skadelege sjukdommane på eple og pære. I tillegg kan den svært smittsame bakteriesjukdommen angripe ein rekke andre planteslag. Sjukdommen har ennå ikkje nådd til vår del av Fylket. Kun sporadisk påvist smitte i Gulen i Ytre Sogn. Eit angrep vil vere negativt for eple- og pæreproduksjonen, men også for mangfaldet i hagane våre.

Om aksjonen
Spesielt utsette for pærebrann er prydbuskene bulkemispel og pilemispel. Etablerer pærebrann seg i desse to planteslaga, kan den seinare angripe eple- og pæretre og andre prydvekstar. I sommar startar derfor ein førebyggjande aksjon i Nordfjord. Målet med aksjonen er fjerne all bulke- og pilemispel i distriktet, og slik hindre etablering av pærebrann i dette området. For Nordfjordområdet er det fruktkommunane Gloppen, Eid og Stryn som vert prioriterte først. Gloppen og Stryn er mesteparten rydda i 2008.
à Oppstart i Eid kommune: 15. juni 2009..
Ved å fjerne desse to vertplantane, legg vi også til rette for ei levedyktig birøkt som flytter biene sine mellom fruktblomstringa i indre områder til lyngen ved kysten. Aksjonen er eit samarbeid mellom Mattilsynet og nemnde kommunar i Nordfjord, fylkesmannens landbruksavdeling, Bioforsk, Forsøksringen Sogn og Fjordane, fruktnæringa, Hageselskapet, lokale hagelag og Sogn birøkterlag. Ennå er det ikkje observert pærebrann i distriktet vårt. Aksjonen som nå startar opp vil vere eit viktig bidrag for å halde smittepresset nede.

Pærebrann kan bli ein av dei farlegaste plantesjukdommane i norsk hagebruk og fruktproduksjon om vi ikkje gjer ein innsats for å hindre vidare spreiing. Mattilsynet treng hjelp frå deg som privatperson i dette arbeidet! Mattilsynet oppfordrar alle til å vere med på dugnad i kampen mot pærebrann. I praksis vil ein slik dugnad innebere å hogge ned bulkemispel og pilemispel i din eigen hage, og melde frå til Mattilsynet på tlf 06040 eller kommunen om at du har rydda. Det er også ynskjeleg med ei melding om du veit om førekomst av bulke og pilemispel på friområde.

Kva er pærebrann?
Pærebrann er ein plantesjukdom forårsaka av bakterien Erwinia amylovora. Den angriper eple- og pæretre og i tillegg ei rekke andre vertplanter i rosefamilien. Totalt er det ca 180 arter i 39 slekter i rosefamilien som har vist seg mottakelige for slik smitte. Dei vanlegaste vertplantene i Norge er bulkemispel, Cotoneaster bullatus, og pilemispel, Cotoneaster salicifolius, men den er også funnen på sprikemispel, krypmispel, blankmispel, eldkvede, sølvasal og eple. Bakterien angrip og drep blader, blomster og bark, og skot, greiner og stamme på plantene. Det finst ikkje effektive, kjemiske middel mot pærebrann, og sjukdomen er derfor vanskeleg å bekjempe. Den viktigaste spreiemåten er med smitta plantemateriale, men også insekt, bikuber, utstyr til beskjering, regn og vind, er viktige lokale spreiarar.
Pærebrann har vært kjent i Nord-Amerika i over 200 år, og kom til Europa på 1950-tallet. Sjukdommen blei første gong oppdaga i Norge i 1986, og sidan då har det vore lagt ned betydeleg innsats for å bekjempe den. Likevel spreier pærebrann seg, hovudsakeleg i dei ytre kyststrøka, og den er funnen i Rogaland, Hordaland, Sogn og Fjordane og Vest-Agder.

Symptom på pærebrann
Typiske symptom på pærebrann er ein kraftig mørkfarging ved bladbasis, samt at skotspissane bøyer seg og gjerne får form som ein gjetarstav. I tillegg heng blada lenge på greinene, noe som gir eit svidd (jf namnet pærebrann) inntrykk når vi ser smitta busker på avstand. Ved å rispe litt i barken på ein grein i skiljet mellom sjukt og friskt vev, kan ein sjå ein glidande overgang, gjerne med olivengrøn farge. Til samanlikning har frostskader typisk markerte skilje mellom friskt og død plantevev.

Norsk regelverk
Forskrift av 01.12.2000 nr. 1333 om planter og tiltak mot planteskadegjørere (plantehelseforskrifta) har føresegner som vedrørar pærebrann. Blant anna er det strenge restriksjonar på import av vertplanter frå land der pærebrann førekjem. I Norge har vi ein egen forskrift mot spreiing av pærebrann: Forskrift av 25.04.2007 nr. 541 om tiltak mot pærebrann (i ein rekke med kommunar i Vest-Agder, Rogaland, Hordaland og Sogn og Fjordane). Forskrifta tek spesielt for seg flytting av bikuber, beskjering og kantklipping, samt registrering av verksemder som omsett vertplanter for pærebrann i smitta områder.

Frå 1986, da pærebrann først vart oppdaga her i landet, har det vært forbode å både plante og omsette bulke- og pilemispel nettopp på grunn av dei er svært mottageleg for pærebrann og faren for vidare smittespreiing frå desse plantene. Det har også vore forbode å innføre ei rekke andre vertplanter for pærebrann sidan 1986.

Kva kan du som hageeigar gjere?
Rydd bort eigne bulke- og pilemispel, og gjerne dei som finst på friareala der du bur! Etter nedhogginga, kan det vere lurt å behandle snittflata med plantevernmiddelet Glyfosat eller spa opp røtene. Og har du allereie føreteke ryddinga, så er oppfølging og etterrydding viktig, sidan det i fleire år framover vil finnast store frøbankar i jorda. Avfall av bulke og pilemispel kan leggast der du elles kastar plantemateriale frå hagen din.

Ein stor utfordring når det gjelder bekjemping av pærebrann i Norge, er at spesielt den lett mottakelige bulkemispelen er spreidd i stor skala også til friområde, langs veier og liknande. Berre det å finne vertplantene er ein stor jobb, og me oppmodar folk til å melde frå til Mattilsynet på telefon 06040 eller til kommunen om at du har rydda hagen din, eller kjenner til områder med bulke- og pilemispel.

Det er også viktig å ikkje frakte plantemateriale med pærebrannsmitte ut av område med pærebrann som til dømes Bergensområdet. Det har vore forbode å plante bulke- og pilemispel i over 20 år. Har du bier og bor i områder med pærebrann, må du passe på å følgje reglane for når og kor du kan flytte bikubene.

Aktuelle nettsider:
http://www.mattilsynet.no: Her finst mykje informasjon, samt henvising til andre sentrale sider inkludert regelverk.

Kontaktpersonar i Mattilsynet:
Rune Otterdal, Mattilsynet sitt distriktskontor for Nordfjord. Tlf 57 84 95 76/ 99 45 07 90"

Hagevandring på Straumshamn

2009-06-12T11:08:00.009+02:00

I går var vi så heldige å få komme på besøk til Ingunn Løset og Edvin Hondstad sin hage på Straumshamn. Dette er den hagen som mange av oss har beundra frå bilvindauga når vi har køyrt forbi Straumshamn. Dei kunne fortelje at dei overtok ein overgrodd hage når dei kjøpte huset, som hadde stått tomt nokre år. Då var det til å gå laus med ljåen og saga, for i det heile å kunne klare å få skikk på det som ein gong var ein flott hage. Resultatet var virkelig bra. Til tross for at det var fuktig etter nokre regnfulle dagar, var det litt av kvart å kaste augene på for dei omlag 16-20 personane som hadde møtt fram.

Gullregnen er i slutten av blomstringa, men praktfull likevel.

Hagen er full av Rhododendron i ulike fargar og storleikar. Edvin fortalte at han stadig la ned greiner av Rhododendron og dekka med jord. På den måten kan han fylle hagen med flotte, eigenproduserte plantar.

Ulike bronseblad stod i all sin prakt omkring i hagen.

Ein regntung, men fortsatt flott peonblomst.

Utsikta frå hagen var det heller ikkje nono å utsetje på. Regnskyene hang tungt rundt fjella, men skåna oss for dei verste bygene.

Nokre snøballar er rett så velkomne i juni.

Ein liten mini jordbæråker i sinkbaljen ved sitjeplassen.

Euphorbia og Rhododendron på rad og rekkje.

Vi takkar for ein flott omvisning i hagen. Vertskapet sette heilt tydeleg pris på besøket, og ynskte oss velkomne attende.

Regionsmøte i Hornindal

2009-06-09T19:54:00.012+02:00

Søndag var det tid for det årlege regionsmøte for Hageselskapet region Nordfjord. Sekretæren var den utvalgte til å delta på møtet i år. Dette blir ikkje noko referat frå møtet, men berre litt bilete som viser kva Hagelaget i Hornindal baud på denne dagen.

Først hagevandring i den flotte hagen til Gunnhild Humborstad:

Koselig rom i hagen.

Tenk å ha denne flotte utsikta frå hagen sin....

Etterpå var vi ein tur innom Anders Svor museumet

Under ser du bilete av eit par av dei imponerande arbeida hass.

Hagevandring torsdag 11. juni

2009-06-07T23:13:00.002+02:00

Eit par av dei som stoppa og slo av ein prat på planteloppemarknaden laurdag inviterte oss på hagevandring. Dei har ein hage som mange sikkert har lagt merke til når ein køyrer forbi Straumshamn. Oppi skråninga ligg ein fantastisk hage.

Det er Ingunn Løset og Edvin Hondstad som hagar der. Har du lyst å være med oss på hagevandring, så slå følge med oss på torsdag 11. juni. Vi køyrer frå busstasjonen på Nordfjordeid kl 18.00.Vel møtt!

Planteloppemarknad

2009-06-06T22:32:00.004+02:00

Då er årets planteloppemarknad over. Vi kombinerte med lotteri og fine premiar. Det fantastiske veiret i dag gjorde det til ein fryd å stå på standen og selje plantar. Det var mange som tok seg tid til ein ekstra prat rundt loddbøtta.

Der var litt av kvart å velje i blandt loppene også. Det var godt og variert utval, så der var litt for ein kvar smak.

Laurdag 6. juni er det tid for planteloppemarknad

2009-06-02T23:09:00.000+02:00

Det nærmar seg planteloppemarknad med stormsteg. Vi håpar at mange av medlemmene har ein plante eller fleire å avsjå til denne dagen. Dersom dagen blir vellukka gjev dette ein ekstra slant i kassen, som i neste omgang gjer at vi kan arrangere fleire ting med f.eks betalte foredragshaldarar og liknande.

Ta gjerne kontakt på mail: eidhagelag@yahoo.no eller tlf 99161392 og sei i frå om du har noko å avsjå. Om du er oppteken denne dagen kan lopper leverast på førehand etter avtale. Det treng ikkje være store saker, eller sjeldne saker - vi er heller ute etter mangfald.

For at det skal bli litt lettare for deg som har ein plante eller fleire som du kan tenke deg å donere til loppemarknaden, viser vi her nokre bilete som viser korleis ein tenkjer seg at plantane kan lagast til på førehand.

Denne flotte tua med primula har blitt til 24 småplantar som er perfekte til ein planteloppemarknad.

Først vart tua delt i småplantar, omlag på denne størrelsen.

Til sist vart dei potta opp i småpotter.

Dersom du veit namnet på planten er det viktig å setje det på. Her er det skrive på ein pinne og putta nedi jorda, men du kan også skrive på potta med vassfast tusj, eller klistre navnelappe på potta. Det er berre å bruke fantasien.

Kanskje du er av dei som likar å så om våren, og alltid har for mange av kvar sort. Vi tek gjerne imot overskotet. Kanskje det er andre som manglar akkurat den planten du sådde litt for mange av.

Til alle dåkke andre som berre har lyst på nye plantar eller berre er litt nysgjerrig: De finn oss ved Moengården vest omlag i tida 10 til 15 laurdag 6. juni.

Fantastisk hagevandring i Ørsta

2009-06-01T22:42:00.010+02:00

Dette var meldinga som møtte oss då vi kom til hagen til Sissel Ytreeide. Vel, no var korkje kona eller hunden hennar noko særleg skremmande...tvert om, så var både hunden og Sissel svært så trivelige :) Vi var tilsaman ca 14-15 personar, og under kan du sjå meir av det vi var så heldige å få sjå. Innan for porten hadde ho eit blått hjørne med ein bitteliten hagedam. Ingen tvil om at Hosta var ein av favorittane hennar. Ho hadde kring 30 ulike hosta, og namna på dei kunne ho på rams.

Lekkert!
Denne flotte dammen hadde ho vunne pris for. Ei veke til Chelsea flowershow var premien. Spennande å høyre om kva ho opplevde og såg der.

Ein stille krok i det grøne rommet. Her inne var det fred og ro som råda. I desse deilige solstolane må det være deilig å slenge seg ned med ein kopp kaffi og ei god bok etter dagens hageøkt.

Eller kanskje det freista meir å slange seg i hengekøya nederst i hagen? Uansett kor ein vandra, var det fantastisk å sjå kor velstelt og stilfullt det var i hagen.

Acer i alle fargar og variantar fann vi overalt i hagen

Rhododendronblomstringa var fantastisk. Alle matcha i fargane, og Sissel hadde selvfølgelig namnet på alle klart.

Artig plante nederst i hagen. Denne var litt av eit blikkfang med dei store blada!

Edit: Herdis har vore så snill å legge inn kommentar om at planten heiter Astilboides tabularis .

Denne Acer'en og Allium Giganteum var ein lekker kombinasjon.

Hagevandring i Ørsta torsdag 28. mai

2009-05-13T09:08:00.008+02:00

Torsdag 28. mai tek vi turen til Sissel Ytreeide sin hage i Ørsta. Då satsar vi på at veiret blir mykje finare enn sist vi var på tur, slik at vi får sjå både Rhododendron og hagedam i sin fulle prakt.

Vi samlast ved busstasjonen på Nordfjordeid, og køyrer samla til Ørsta. oppmøte kl 18.00 ferja går frå Folkestad kl 18.45.

Det kostar kr 50 for kvar deltakar for å dekke ferje og køyring.

Etter vandringa tek vi oss som vanleg ein kaffitår med noko attåt. Loddsalg med hagerelaterte premiar vert det sjølvsagt også :)

Om du ikkje er medlem, men berre er hageintressert og litt nysgjerrig på kva vi styrar med i hagelaget, så er du hjarteleg velkommen til å være med oss!

Hagevandring i ruskeveir

2009-05-06T23:11:00.005+02:00

I dag hadde vi årets første hagevandring. Turen i dag gjekk til Eli Orheim på Stårheim. Det regna godt, men jammen vart vi 15-16 personar likevel :) Det er vel sånn det er, litt regn har vel aldri stoppa ein god vestlending.... Det finst ikkje dårleg veir....osv...

På tunet hadde Eli laga ein flott oppsats av noko av det ho har i hagen. Jammen kan det bli mykje flott blomsterflor, sjølv om det er tidleg i sesonen enno!

Det var ikkje berre blomster å sjå i hagen. Her ein fin liten kreasjon med stein og trevirke. Det var mykje flott stein i hagen. Alt frå slike små runde steinar til flotte bergflater som stakk opp av plenen.

Skal tru om ikkje dette var japansk prydkirsebær. Uansett var blomstrane utruleg skjønne!

Dette biletet er frå rota på det samme tredet. Litt av eit blomsterflor!

Utsikta frå hagen var flott! Det dårlige veiret yter ikkje utsikta rettferdigheit i dag, desverre.

Etter hagevandringa vart det kaffi, kaker og loddtrekning i den flotte grillhytta hennar. Ho hadde fyrt opp i grillen, så det var varmt og godt. Det gjorde virkelig godt etter å ha vandra rundt i det sure regnveiret :)

Hildenes gartneri

2009-04-27T21:45:00.007+02:00

Til tross for kluss med annonseringa klarte vi å tromme saman ein gjeng hageintresserte til dagens arrangement på Hildenes gartneri. Saman med gjengen frå Hornindal hagelag, så vart vi ein passeleg stor gjeng. Som biletet over viser, var det litt av kvart spanande å sjå. Før omvisninga fekk vi ein demonstrasjon på korleis vi kan lage flotte oppsatsar og mindre, men svært dekorative arrangement.

Her er det Irene som fortel om livet i drivhusa på gartneriet. Dei fleste av oss som møtte opp vart overraska over dei store mengdene blomster gartneriet produserer sjølv.

Det neste arrangementet blir hagevandring hjå Eli Orheim på Stårheim. På grunn av den fantastiske våren vi har hatt så langt, er arrangementet framskunda til 6. mai. Vi må rett og slett skunde oss å sjå hagen, fordi den er på sitt beste på vårparten :)

Håpar mange nye, hageintresserte vil komme!

Omvisning på Hildenes gartneri

2009-04-22T21:46:00.008+02:00

Mandag 27. april slår vi oss saman med 'Honndølene'. Vi tek då turen til Hildenes gartneri, der vi vil få omvisning og litt demonstrasjon av Irene Berteig. Omvisninga startar kl 18.00, og vil vare ca ein times tid. Om du ynskjer å handle litt, kan du gjere det før omvisninga startar.

Etterpå går turen til Bryggen hotell. Der kan vi fortsette hagepraten over ein kopp kaffe eller te.

Vel møtt!

Hagetrendar og forslag til samplanting ved Marlen Foseid

2009-04-22T18:01:00.005+02:00

Her er altså den blide dama som Vågsøy hagelag hadde invitert til å holde foredraget "Hagetrendar og forslag til samplanting" på Fjordly i går. Det var fleire frå Eid hagelag som tok turen, og det vart verkeleg ein trivelig kveld! Mange fekk gode idear og til korleis pottene i hagen skal sjå ut i år.

I pausen vart det selt lodd, og vi fekk både rundstykker og kaffi. Etter foredraget vart vinnarlodda trekte av leiar i Vågsøy hagelag, Eva Hagen.

Turen i går var for så vidt spontan, etter ein invitasjon frå Vågsøy hagelag. Det er godt mogeleg at det vert fleire slike turar som ikkje står på Eid hagelag sin plan for året, i så fall vill det verte annonsert på bloggen. Så om du er intressert, kan det lønne seg å stikke innom bloggen med jamne mellomrom.

Hagetrendar og forslag til samplanting ved Marlen Foseid

2009-04-16T21:41:00.005+02:00

Vågsøy hagelag arrangerer foredrag med Marlen Foseid tirsdag 21. april. Dersom det er hageintresserte frå Nordfjordeid som kunne tenke seg å få med seg dette foredraget, kan vi køyre saman.

Avreise frå busstasjonen tirsdag 21.april kl 18.15.

Klikk på bildet for å forstørre det.

Kurs i pilfletting

2009-03-29T21:14:00.008+02:00

Denne helga kom Else Kosberg Garshol frå firmaet Pil og litt til og heldt kurs i pilfletting.

Det var 8 deltakarar på kurset.

Laurdagen fekk vi lage ei slik korg som Elsa demonstrerer her.

Vi fekk lære nokre grunnleggande teknikkar som kan brukast til svært mange forskjellige ting laga av pil. På biletet her er det botnen på korga som blir til.

Ho hadde med seg buntar med ulike sortar pil. Pilen vert tørka etter hausting. Før den kan nyttast til fletting må den ligge i bløyt i ca 14 dagar. Så aktiviteten må nok planleggast litt.

Søndagen lagde vi litt forskjellige ting. Her er Elsa i gang med å lage ei fuglekasse.

Samme prinsipp som vart brukt til å lage fuglekassa, kunne ein bruke til å lage ein artig engel. Mange av deltakarane nytta også høvet til å lage små espalier til blomsterpottene sine.

Hageprogram på TV?

2009-03-27T19:40:00.003+01:00

Er du av dei som skulle ønske du kunne sjå meir hageprogram på TV? Ein del utanlandske kanalar sender mange gode program som ein del hageintresserte ynskjer å kunne sjå på norske kanalar. Kun nokre få program blir sendt på norske kanalar, og då desverre ofte kun på dagtid.

Ei driftig dame på hageforumet HagEgal har satt igang ei underskriftskampanje på internett slik at vi hageintresserte kan prøve påvirke NRK og TV2 i fellesskap.

Ta ein kikk på linken, og skriv under dersom du er einig!

Inspirasjonsmesse i Førdehuset

2009-03-20T10:43:00.003+01:00

For dei av dåkke som ynskjer noko hagerelatert å fylle helga med, kan det kanskje være verdt å ta turen til inspirasjonsmessa i Førdehuset i helga.

Ta ein kikk på denne linken og bli inspirert.

Det er høve til å få med seg foredrag som kan gje idear og inspirasjon til å starte våren i hagen:

Same program begge dagar - 30 minutts foredrag.
Jostein Kjøsnes: kl 1300: "Idear til hagen"
Brynjulv Litlere: kl 1400: " Bruk av plantar i hagen"
Jostein Kjøsnes: kl 1500: "Enklare vedlikehald av hagen"

Kurs i pilfletting

2009-03-19T22:38:00.002+01:00

28. og 29. mars arrangerer Eid hagelag kurs i pilfletting.

Det er Else Kosberg Garshol frå firmaet Pil og Litt til som er kurshaldar. Ta ein kikk innom nettsidene som linken fører deg til, det er utruleg kor mykje spanande ein kan lage av pil.

Kurset er fullteikna.

Sesongstart i hagelaget

2009-03-19T20:29:00.000+01:00

Sesongstart for Eid hagelag var 12. februar. Tema for dagen var såing av stauder og sommarblomster. Det var omlag 10 personar som møtte denne dagen, og det vart ein triveleg kveld med lystig prat og diskusjonar.

Harald Bakke er hagelaget sin guru når det gjeld såing av stauder. Han delte villig vekk sine erfaringar. Han hadde med seg jord, potter og frø, og viste oss korleis det skulle gjerast og svarte på spørsmål undervegs.

Herdis, leiaren i hagelaget, er sjølv ivrig såar, og fulgte nøye med for å få med seg gode tips og idear.

Sånn ser det ut i pottene når Harald er ferdig å så. Desse pottene gav han vekk til hagelaget si utlodning. Då spørs det om vinnarane har like grøne fingrar som Harald har.

Hagelaget hadde kjøpt inn lotteripremiar som høva godt til tema for dagen. I tillegg til eit par slike og Harald sine ferdigsådde potter var der nokre posar med frø i premiepotten.

Kom gjerne innom bloggen vår og sjå kva vi skal til med i tida framover, kanskje vi kan lokke deg til å være med oss?

Anten du er medlem i Hageselskapet eller ikkje, så er du like velkommen på arrangementa våre.